އެމްއެންޕީގެ ރައީސް ކަމަށް ކާނަލް ނާޒިމް ހޮވިއްޖެ

މޯލްޑިވްސް ނޭޝަނަލް ޕާޓީ (އެމްއެންޕީ) ގެ ރައީސް ކަމަށް ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު ކާނަލް މުހައްމަދު ނާޒިމް ހޮވިއްޖެ އެވެ.

އެމްއެންޕީގެ އިންތިގާލީ ކައުންސިލްގެ މަގާމުތަކަށް ކުރިމަތިލުމަށް މިދިޔަ އަންގާރަ ދުވަހު ހުޅުވާލި އިރު އެ މުއްދަތު ވަނީ އިއްޔެއަށް ހަމަވެފަ އެވެ. އަދި މިމަގާމު ކާނަލް ނާޒިމަށްލިބުނުއިރު މިމަގާމަށް ވާދަކުރީ ވެސް ނާޒިމް އެކަންޏެވެ. އެހެންކަމުން ނާޒިމް މިމަގާމަށް ހޮވުނީ އެއްވެސް ވޯޓަކާ ނުލަ އެވެ.

ޕާޓީގެ ރައީސްއަށް ވާދަކުރުމަށް ހުޅުވާލިއިރު ނާއިބު ރައީސް އަދި އަންހެނުންގެ ވިންގް ލީޑަރާއި ޒުވާނުންގެ ވިންގް ލީޑަރާއި، ކައުންސިލު މެންބަރުން ހޮވުމަށް ވެސް ވަނީ ހުޅުވާލާފަ އެވެ.

އެގޮތުން އަންހެނުންގެ ވިންގް ލީޑަރުންނަށް ކުރިމަތިލެއްވި ތިން ބޭފުޅުންގެ ތެރޭގައި ރައީސް މައުމޫންގެ ދަރިކަނބަލުން ދުންޔާ މައުމޫން ވެސް ހިމެނިވަޑައިގަންނަވަ އެވެ. ޔޫތު ވިންގް ލީޑަރު ގެ މަގާމަށް ވެސް ތިން ބޭފުޅަކު ވަނީ ކުރިމަތިލައްވައިފައެވެ. އަދި ހަ ނާއިބުންގެ މަގާމަށް 7 ބޭފުޅަކު ކުރިމަތިލައްވާފައިވާއިރު ދެ އަންހެން ބޭފުޅުންވެސް ވަނީ ކުރިމަތި ލައްވައިފަ އެވެ. ނާއިބު ރައީސްގެ އެއް މަގާމަކީ އަންހެން މެންބަރަކަށް ހާއްސަކޮށްފައިވާ މަގާމެކެވެ.

އެމްއެންޕީން ބުނީ އިންތިހާބުގައި ބައިވެރިވުމަށް ޖުމްލަ 54 ފޯމު ހުށަހަޅާފައިވާ ކަމަށެވެ. އަދި ޕާޓީގެ މަގާމުތަކަށް ކުރިމަތިލާފައިވާ ފަރާތްތަކުގެ ތެރެއިން އެއްވެސް ޝަކުވާއެއް ހުށަހަޅަން ބޭނުންވާ ނަމަ، އެކަން މިއަދު މެންދުރު 14:00 ގެ ކުރިން ޕާޓީގެ އިދާރާއަށް ހުށަހަޅަން ވާނެ ކަމަށްވެސް އެމްއެންޕީއިން ބުނެ އެވެ.