އެކްސްޕޯ 2020ގެ ފުރަތަމަ ހަފްތާ ވަރަށް ކާމިޔާބު: އިކޮނޮމިކް މިނިސްޓްރީ

އެކްސްޕޯ 2020ގެ ފުރަތަމަ ހަފްތާ ވަރަށް ކާމިޔާބުކަމަށް އިކޮނޮމިކް މިނިސްޓްރީން ވިދާޅުވެއްޖެއެވެ.

މިފަހަރު ބާއްވާ ވޯލްޑް އެކްސްޕޯ 2020 ހާއްސަ ވެގެންދާ އެއް ސަބަބަކީ މިއީ މިފަދަ އެކްސްޕޯއެއް މެދުއިރުމަތީގައި ބޭއްވިގެންދާ ފުރަތަމަ ފަހަރެވެ. މި އެކްސްޕޯގެ ރާއްޖޭގެ ޕެވީލިއަންއަށް އދ.ގެ ޖެނެރަލް އެސެމްބްލީގެ ރައީސް އަދި ދިވެހިރާއްޖޭގެ ފޮރިން މިނިސްޓަރ އަބްދުއްﷲ ޝާހިދުވަނީ ޒިޔާރަތްކުރައްވާ ކޮންޓިންޖެންޓް ޓީމާ މުހާތަބުކުރައްވައި ބައްދަލު ކުރައްވާފަ އެވެ.

މީގެ އިތުރުން މިނިސްޓަރ އޮފް އެންވަރަންމެންޓް، ކްލައިމެޓް އެންޑް ޓެކްނޮލޮޖީ އާމިނަތު ޝައުނާވެސް ވަނީ ދިވެހިރާއްޖޭގެ ޕެވިލިއަންއަންއާއި އިޓަލީ ޕެވިލިއަންއަށް ޒިޔާރަތް ކުރައްވާފައެވެ.

މިނިސްޓަރ ޝައުނާ ވަނީ "ގްރީން ކްލައިމެޓް" ފޯރަމްގައި ބައިވެރިވެލައްވާ ދިވެހިރާއްޖެ ތަމްސީލުކޮށްދެށްވާފައެވެ. އިޓަލީ ޕެވިލއަންގައި ވަނީ ދިވެހިރާއްޖޭގެ ހިތްގައިމު ކަނޑު އަޑީގެ މަންޒަރުތައް މޫދުބުޅާ ޑައިވް ސެންޓަރާ ގުޅިގެން ފ.އަތޮޅުން ލައިވްކޮށް ދައްކުވައިދީފައެވެ. އަދި މީގެ އިތުރުން ކޮރަލް ރެސްޓޮރޭޝަނާ ބެހޭ ޕޮރޮގްރާމެއްވެސްވަނީ ކުރިއަށް ގެންގޮސްފައެވެ.

އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުވެސް ވަނީ ދުބާއީއަށް ވަޑައިގެން އެކްސްޕޯ 2020ގެ ދިވެހިރާއްޖޭގެ ޕެވިލިއަންއަށް ޒިޔާރަތް ކުރައްވާފައެވެ.

"ކަނެކްޓިންގ މައިންޑްސް، ކްރިއޭޓިންގ ދަ ފިއުޗަރ" މި ޝިއާރުގެ ދަށުން ކުރިއަށް ގެންދާ "އެކްސްޕޯ 2020 ދުބާއީ"ގެ އަމާޒަކީ އިންގިލާބީ އީޖާދުތަކާއި ތަފާތު ހިޔާލުތައް އެއްތަނަކުން ދައްކުވައިދީ، މި ހިޔާލާއި ވިސްނުމުގެ ތެރެއިން އިންސާނިއްޔަތަށް ހެޔޮ ބަދަލުތަކެއް ގެނައުމަށް މަގުފަހި ކޮށްދިނުމެވެ.