ޔޫތު މިނިސްޓްރީގެ އަމާޒަކީ އެކި ދާއިރާތަކުން ޒުވާނުންނަށް ތަފާތު ފުރުސަތުތައް ފަހިކޮށްދިނުން: ޝައުފާ

ޔޫތު މިނިސްޓްރީ އަދި ސަރުކާރުގެ ވިސްނުމަކީ ޒުވާނުން އެކި ރޮގު ރޮގުން ތަމްރީނުކޮށް ޒުވާނުންނަށް ތަފާތު ގިނަ ފުރުސަތުތަކެއް ފަހިކޮށް ދިނުންކަމަށް ކުޅުދުއްފުށީ ސްޓޭޑިއަމްއާ ހަވާލުވެހުންނެވި ޔޫތް އެގްޒެކިއުޓިވް ޝައުފާ އިބުރާހިމް ހިލްމީ ވިދާޅުވެއްޖެ އެވެ.

އާދިއްތަ ދުވަހު ކުޅުދުއްފުށީގައި ފެށި ނޫސްވެރިކަމުގެ ކުރު ތަމްރީނު ޕްރޮގުރާމު ފެށުމުގެ ރަސްމިއްޔާތުގައި ވާހަކަދައްކަވަމުން ޝައުފާ އިބުރާހިމް ހިލްމީ ވިދާޅުވީ މި ތަމްރީނު ޕްރޮގުރާމުން ޒުވާނުން ނޫސްވެރިކަމަށް ނުވަތަ މީޑިއާއަށް އަހުލުވެރިކުރުމަށް ބާރު އެޅުމުގެ ގޮތުން ކުރިއަށްގެންދާ ޕްރޮގުރާމެއް ކަމަށެވެ.

"މިފަދަ ކޮންމެ ފުރުސަތެއްގެ ބޭނުން މި ސިޓީގެ ޒުވާނުން އުފަލާއެކު ބޭނުންކުރާތީ ޝުކުރު ދަންނަވަން." ޝައުފާ ވިދާޅުވި އެވެ.

މިފަދަ އެތަކެއް ކޯސްތަކެއް ކުރިއަށް އެބަހުރި ކަމަށާއި މިއިން ކޮންމެ ފުރުސަތަކީ ޒުވާނުން ހަމަ އިސްކޮޅަށް ތެދުވަން ލިބޭނެ ފުރުސަތެއްކަން އޭނާ ފާހަގަކުރެއްވި އެވެ.

ނޫސްވެރިކަމާ ބެހޭ ގޮތުން ވާހަކަދައްކަވަމުން ޝައުފާ ވިދާޅުވީ، ނޫސްވެރިކަމަކީ ޑިމޮކްރެޓިކް ގައުމެއްގައި މުހިންމު ބައެއް ކަމަށެވެ. އަދި ވެރިކަމެއް ހަރުދަނާވަމުން އަންނަ ޖުމްހޫރިއްޔަތެއްގެ ނިޒާމުގެ ޅަފަތުގައި އޮތް ގައުމެއްގައި ޑިމޮކްރަޓިކް އަސާސްތައް ވަރުގަދަކުރާނެ ގިނަ ގުނަ ތަނބުތަކެއް ބިނާކުރަން ޖެހިފައިވާއިރު، ނޫސްވެރިކަން ދަސްކޮށް ގައުމުގައި ފަންނީ ނޫސްވެރިކަމެއް ކުރިއެރުވުމަކީ މިފަދަ މުހިންމު އެއް މަސައްކަތްކަން އޭނާ ވިދާޅުވި އެވެ.

މިނިވަން ކަމާއެކު ވަކި ފަރާތަކަށް ބުރަނުވެ ހަމަހަމަ އުސޫލުން ނޫސްވެރިކަން ކުރުމަކީ ނޫސްވެރިކަމުގެ މައިގަނޑު އަސާސްކަން ފާހަގަކުރައްވަމުން އޭނާ ވިދާޅުވީ، މިދާއިރާއަށް އަލަ ނުކުންނަށް ފަރާތްތަކަށް އެދެނީ ނުފޫޒުން އެއްކިބާވެ ތިބެ ޒިންމާދާރު ކަމާއެކު ނޫސްވެރިކަން ކުރުކަމަށެވެ.

ފަސް ދުވަހުގެ މުއްދަތަށް ކުރިއަށްގެންދާ މި ޕްރޮގުރާމަކީ ޒުވާނުންގެ ދުވަހާ ގުޅުވައިގެން ޔޫތް މިނިސްޓްރީ އާއި ސިޓީ ކައުންސިލާ ގުޅިގެން ކުރިއަށްގެންދާ ހަރަކާތެކެވެ.