ކޯޓުތަކަށް އިސްލާހު ގެނައުމުގެ ގާނޫނުގެ ބިލްގެ އިތުރުން ތިން ބިލެއް އޭޖީން ރައީސް އޮފީހަށް

ކޯޓުތަކުގެ ގާނޫނަށް އިސްލާހު ގެނައުމުގެ ބިލްގެ އިތުުރުން ތިން ބިލެއް އެޓާނީ ޖެނެރަލްގެ އޮފީހުން ރައީސް އޮފީހަށް ފޮނުވައިފިއެވެ.

ރައީސް އޮފީހަށް ފޮނުވާފައިވާ ހަތަރު ބިލުގެ ތެރޭގައި ހިމެނެނީ ކޯޓުތަކުގެ ގާނޫނަށް އިސްލާހު ގެނައުމުގެ ބިލާއި ފެނާއި ނަރުދަމާގެ ގާނޫނަށް އިސްލާހު ގެނައުމުގެ ބިލާއި އަދި ނެތިދިއުމުގެ ބިރުހީވެފައިވާ ދިރޭތަކެތީގެ ބައިނަލްއަގްވާމީ ވިޔަފާރިކުރުމުގެ ބިލުގެ އިތުރުން ފަނޑިޔާރުންގެ ގާނޫނަށް އިސްލާހުގެނައުމުގެ ބިލެވެ.

މި ބިލުތައް ފޮނުވާފައިވަނީ ސަރުކާރުގެ ފަރާތުން ހުށަހަޅާ ބިލުތަކުގެ ގޮތުގައި ރައްޔިތުންގެ މަޖިލީހަށް އެ ބިލުތައް ފޮނުވުމަށެވެ. ރައްޔިތުންގެ މަޖިލީހުގެ ތިން ވަނަ ދައުރަށް ސަރުކާރުގެ ފަރާތުން 32 ބިލެއް ހުށަހަޅަން ނިންމައިފައިވެއެވެ.

މީގެ އިތުރުން ވެސް 16 ބިލެއް ސަރުކާރުން މަޖިލީހަށް ހުށަހަޅަން ނިންމާފައިވާ ބިލުތަކުގެ ތެރޭގައި ހިމެނެއެވެ.