ބޯޓުދެލި ބޭނުންކުރުން ހުއްޓާލުމަށް ކޮޕް26ގެ ބައިވެރިން އެއްބަސްވެއްޖެ

ހަކަތަ އުފެއްދުމަށްޓަކައި ބޯޓުދެލި އެންދުން ހުއްޓާލުމަށް މިހާރު ކުރިއަށް ދާ އދ.ގެ ތިމާވެއްޓާ ބެހޭ މަހާސިންތާ، ކޮޕް26ގެ ބައިވެރިން އެއްބަސްވެއްޖެ އެވެ.

އިނގިރޭސިވިލާތުގައި މިހާރު ކުރިއަށްގެންދާ މި މަހާސިންތާގައި އެ ގައުމުގެ ސަރުކާރުން ބުނީ ބޯޓުދެލި އެންދުން ހުއްޓައިލުމަށް އެއްބަސްވީ، އެންމެ ގިނައިން ބޯޓުދެލި އަންދާ ބައެއް ޤައުމުތަކާއި ބައެއް ޖަމިއްޔާ ޖަމާއަތްތައް ހިމެނޭ ގޮތުން، 190 ފަރާތަކުންނެވެ.

އެގޮތުން ބޯޓު ދެލި އެއްދުން ހުއްޓާލުމަށް އެންމެ ގިނައިން ބޯޓުދެލި އަންދާ ގައުމުތައް ކަމަށްވާ، ޕޮލެންޑާއި ވިއެޓްނާމް އަދި ޗިލީވެސް ވަނީ އެއްބަސްވެފައެވެ. ނަމަވެސް އޮސްޓްރޭލިޔާ، އިންޑިއާ، ޗައިނާ އަދި އެމެރިކާ، ބޯޓުދެލި އެންދުން ހުއްޓައިލުމުގެ އެއްބަސްވުމުގައި އަދި ސޮއެއް ނުކުރެއެވެ.

އެއްބަސްވުމުގައި ސޮއުކުރި ހުރިހާ ގައުމުތަކުން އެއްބަސްވެފައިވަނީ، އެ ގައުމެއްގައި ވެސް އަދި އެހެން ގައުމެއްގައި ވެސް، ބޯޓުދެލިން ހަކަތަ އުފައްދާ އާ އިންޖީނުގެތައް އުފެއްދުމަށް އިންވެސްޓް ނުކުރުމަށެވެ.

ބިމު އަޑިން ނަގާ ތެޔޮ އެންދުމުން ޖައްވަށް އަރައިގެންދާ ގެދަބުޅި އަށް ވުރެ، ބޯޓުދެލި އެންދުމުން ޖައްވުގެ ތެރެއަށް އަރައިގެންދާ ގެދަބުޅި މާގިނަ އެވެ.