އަންނަ އަހަރުން ފެށިގެން އަސާސީ ބޭހަށް ގިނަވެގެން ލެވޭނީ 100 ޕަސެންޓް ފައިދާ

އަންނަ ޖެނުއަރީ މަހުން ފެށިގެން އަސާސީ ބޭހަށް ގިނަވެގެން ލެވޭނީ 100 ޕަސެންޓް ފައިދާ ކަމަށް ހެލްތް މިނިސްޓްރީން ބުނެފިއެވެ.

އެ މިނިސްޓްރީން މިގޮތަށް ހަމަޖެއްސީ ޑޮކްޓަރީ ބޭސް ވިއްކޭނެ އެންމެ މަތީ އަގު ކަނޑައަޅަން ވާނެ ކަމަށް ސިއްހީ ހިދުމަތް ދިނުމުގެ ގާނޫނުގައި ބުނެފައިވާތީ އެވެ.

ހެލްތު މިނިސްޓްރީން އިއްޔެ ނެރުނު އިއުލާނެއްގައި ބުނީ، ސިއްހީ ހިދުމަތް ދިނުމުގެ ގާނޫނުގައި ޑޮކްޓަރީ ބޭސް ވިއްކޭނެ އެންމެ މަތީ އަގު ނުވަތަ މެކްސިމަމް ރިޓެއިލް ޕްރައިޒް (އެމްއާރުޕީ) ކަނޑައަޅަން އަންގައިފައިވާތީ ރާއްޖެ އެތެރެކޮށް ވިއްކާ ހުރިހާ ބޭހަކަށް އެމްއާރުޕީ ކަނޑައަޅަން ނިންމާފައިވާ ކަމަށެވެ.

އެގޮތުން ބޭސް ގަންނަ އަގަށް ގިނަވެގެން ލެވޭނީ 100 ޕަސެންޓް މާކްއަޕެއް ކަމަށް ކަނޑައަޅައި، ރާއްޖެ އިމްޕޯޓުކޮށް ވިއްކާ ހުރިހާ އަސާސީ ބޭހަކަށް، ޖެނުއަރީން ފެށިގެން އެމްއާރުޕީ ތަންފީޒު ކުރަން ހަމައްޖައްސާފައިވާ ކަމަށް ހެލްތު މިނިސްޓްރީން ބުންޏެވެ.

ދެވަނަ ފިޔަވަހީގައި، ރާއްޖެ އަށް އިމްޕޯޓުކޮށް ވިއްކާ ހުރިހާ ބޭހަކަށް، މެކްސިމަމް ރީޓެއިލް ޕްރައިޒް ތަންފީޒު ކުރާނެ އެވެ. ދެވަނަ ފިޔަވަހި ތަންފީޒު ކުރާނީ އަންނަ އަހަރުގެ މެދު ތެރޭގަ އެވެ.

އެހެންކަމުން ބޭސް އިމްޕޯޓްކޮށް ވިއްކާ ފަރާތްތަކާއި އާއްމުން މިކަމަށް ތައްޔާރު ކުރުމަށް ޓަކައި އަސާސީ ބޭސް ލިސްޓް، އެމްއާރުޕީއާއެކު ޖެނުއަރީގެ ކުރިން ހެލްތު މިނިސްޓްރީން އާއްމު ކުރާނެ ކަމަށް އިއުލާނުގައިވެއެވެ.

ވޯލްޑް ބޭންކުގެ 2018 ވަނަ އަހަރުގެ ރިޕޯޓަކާ ހަވާލާދީ މަޖިލީހަށް ހުށަހަޅާފައިވާ އަންނަ އަހަރުގެ ބަޖެޓުގައި ބުނެފައިވާ ގޮތުން، މި ސަރަހައްދުގެ ގައުމުތަކާ އަޅާބަލާއިރު ރާއްޖޭގެ ބޭހުގެ އަގުތައް ހުރީ އެވްރެޖް 75.9 ޕަސެންޓް މަތީގައި ކަމަށެވެ.

ޑޮކްޓަރީ ބޭސް ވިއްކޭނެ އެންމެ މަތީ އަގު އަންނަ އަހަރުގެ ތެރޭގައި ސަރުކާރުން ކަނޑައަޅާނެ ކަމަށް ފިނޭންސް މިނިސްޓަރު އިބްރާހިމް އަމީރު ވަނީ ވިދާޅުވެފައެވެ.

މިނިސްޓަރު ވިދާޅުވީ އެފަދަ ފިޔަވަޅެއް އަޅަން ނިންމީ ރައްޔިތުންގެ ޓެކްސް ފައިސާއިން ހިނގާ އިސްރާފުގެ މިންވަރު ކުޑަކޮށް، ދައުލަތުގެ ބަޖެޓުންނާއި ރައްޔިތުންގެ ޖީބުން ބޭސްފަރުވާއަށް ކުރާ ހަރަދު ކުޑަ ކުރުމަށް ކުރާ މަސައްކަތްތަކުގެ ދަށުން ކަމަށެވެ.