އިނގިރޭސި ވިލާތުގެ ގްލާސްގޯގައި 31 އޮކްޓޯބަރ އިން 13 ނޮވެމްބަރ 2021 ކުރިއަށް ގެންދިޔަ އދ ގެ މޫސުމަށް އަންނަ ބަދަލުތަކާބެހޭ މުއާހަދާ ޔޫއެންއެފްސީސީސީގެ ކޮންފަރަންސް އޮފް ދަ ޕާޓީޒްގެ 26 ވަނަ ޖަލްސާ (ކޮޕް26) ނިންމާލައިފި އެވެ.
ރާއްޖޭގެ އެންވާރަމެންޓް މިނިސްޓްރީން ނެރުނު ނޫސް ބަޔާނުގައިވާ ގޮތުން މި ޖަލްސާގައި މި މުއާހަދާގެ 197 ގައުމުން ބައިވެރިވެ "ގްލަސްކޯ ކްލައިމެޓް ޕެކްޓް" އަށް ވަނީ އެއްބަސްވެފައެވެ. މި ޖަލްސާއަކީ ކޮންމެ އަހަރަކު އެއްފަހަރު ބާއްވާ ބައްދަލުވުމަކަށް ވިޔަސް 2019 ވަނަ އަހަރު ގެ ކޮވިޑްގެ ބަލިމަޑުކަމުގެ ސަބަބުން ދެ އަހަރުގެ މެދުކެނޑުމަކަށް ފަހު ބޭއްވި ބައްދަލުވުމެކެވެ. މި ޖަލްސާގެ ރިޔާސަތު ބެލެހެއްޓީ އިނގިރޭސިވިލާތުންނެވެ.
މި ޖަލްސާ ކުރިއަށް ގެންގޮސްފައި ވަނީ 2015 ވަނަ އަހަރު ފާސްކުރެވުނު މޫސުމަށް އަންނަ ބަދަލުތަކާބެހޭ ޕެރިސް އެގްރިމެންޓަށް ޢަމަލުކުރުމަށް ތަފްސީލްކުރަންޖެހޭ އުސޫލުތައް ނުވަތަ "ޕެރިސް ރޫލް ބުކް"ގެ ފުރިހަމަ ނުކުރެވި ހުރި ބައިތަކަށް އެއްބަސްވުމަށާއި އަދި މި މުއާހަދާ އާއި އޭގެ ދަށުން ހެދިފައިވާ ޕްރޮޓޮކޯލް އަދި އެގްރީމަންޓް ތަންފީޒު ކުރަމުން ގެންދާއިރު ނިންމަންޖެހޭ ނިންމުންތައް ނިންމުމަށް ކަމަށް އެ ބަޔާނުގައިވެ އެވެ.
ޕެރިސް ރޫލް ބުކް:
ކާރބަން މާކެޓް:
އެންވާރަމެންޓް މިނިސްޓްރީގެ ބަޔާނުގައިވާ ގޮތުން މި ޖަލްސާ ނިމިގެންދިޔައީ 2015 ވަނަ އަހަރު ފާސްކުރެވުނު މޫސުމަށް އަންނަ ބަދަލުތަކާބެހޭ ޕެރިސް އެގްރިމެންޓަށް އަމަލުކުރުމަށް ތަފްސީލްކުރަންޖެހޭ އުސޫލުތައް، ނުވަތަ "ޕެރިސް ރޫލް ބުކް" ގެ ފުރިހަމަ ނުކުރެވުރި ބައިތަކަށް އެއްބަސްވުމަށް އާދެވި މި ބައިތައް ފާސްކުރެވިގެންނެވެ.
މިގޮތުން ޖައްވަށް ދޫކުރާ ގްރީންހައުސް ގޭސް މަދުކުރުމަށާއި، މޫސުމަށް އަންނަ ބަދަލުތަކުގެ މަޝްރޫއުތައް ހިންގުމަށް އެހީދިނުމަށް އެއްބަސްވުމުގައި ބައިވެރިވާ ގައުމުތަކުން ކަނޑައަޅާ ލަނޑުދަނޑިތަކާއި، މި ލަނޑުދަނޑިތައް ހާސިލްވަމުންދާގޮތް ބަޔާންކުރާ ރިޕޯޓް
ހުށަހަޅާނެ ގޮތުން އުސޫލުތަކަށް އެއްބަސްވެވުނެވެ.
ގްރީންހައުސް ގޭސް ބޭރުކުރާ މިންވަރު މަދުކުރުމަށް ކަނޑައަޅާ ކާބަން ބަޖެޓް ވިޔަފާރީގެ އުސޫލުން ވިއްކާނެ ނިޒާމް އެކުލަވާލައި، މި ނިޒާމްގެ ދަށުން ލިބޭ ފައިސާގެ 5 ޕަސެންޓް ތަރައްޤީވަމުން އަންނަ ގައުމުތަކުގައި އެޑެޕްޓޭޝަން މަޝްރޫޢުތައް ހިންގުމަށް އުފައްދާފައިވާ އެޑެޕްޓޭޝަން
ފަންޑަށް ޖަމާކުރުމަށް ވެސް ފާސްކުރެވުނެވެ.
މިޖަލްސާގައި އެންވާރަމެންޓް މިނިސްޓަރު އާމިނަތު ޝައުނާ ވަނީ އެޑެޕްޓޭޝަންއާ ބެހޭ މަޝްވަރާތަކާމެދު މުއާހަދާގެ ބައިވެރިން އެއްބަސްވުމަކާ ހަމައަށް ގެނައުމަށްޓަކައި ސްޕެއިންގެ މިނިސްޓަރ ތެރީސާ ރިބޭރާއާއެކު މި މައްސަލަ އިސްވެ ފެސިލިޓޭޓް ކުރައްވާ ފައެވެ. އަދި ކާމިޔާބުކަމާއެކު ވަނީ މޫސުމީ ބަދަލުތަކަށް ދުނިޔެ ހޭނުމަށް ކަނޑައަޅާ ލަނޑުދަނޑި (ގްލޯބަލް ގޯލް އޮން އެޑެޕްޓޭޝަން) ކަނޑައަޅާނެ ވާރކް ޕްރޮގްރާމަކަށް އެއްބަސްވެފަ އެވެ. އަދި މި ވާރކް ޕްރޮގްރާމް އިފްތިތާހްކުރާ މަސައްކަތު ބައްދަލުވުން ރާއްޖޭގައި ބޭއްވުމަށް ކަނޑައަޅާފަ އެވެ.
ޓްރާންޕޭރަންސީ:
ޕެރިސް އެގްރީމަންޓްގެ ދަށުން ހުރިހާ ޤައުމުތަކުން ކޮންމެ ދެ އަހަރުން އެއްފަހަރު ހުށައަޅަން ޖެހޭ ރިޕޯޓް "ބައިއެނިއަލް ޓްރާންސްޕޭރަންސީ ރިޕޯޓް" އެކުލަވާލާނެ ގޮތަކާއި މެދު ވަނީ ހުރިހާ ޤައުމުތަކުން އެއްބަސްވެފަ އެވެ. މިއެއްބަސްވުން ބިނާ ކޮށްފައި ވަނީ ޕެރީސް އެގްރީމެންޓް ދަށުން އެކުލަވާލެވުނު އުސޫލާއި، ޤަވާއިދުތަކުގެ މައްޗަށް ބިނާކޮށެވެ.
މިގޮތުން ރާއްޖެއިން އެންމެ ބޮޑަށް ވަކާލާތު ކުރީ ރާއްޖެ ފަދަ ވަސީލަތްތައް މަދު ޤައުމުތަކުން މި ދެންނެވި ރިޕޯރޓް ހުށެއެޅުމުގައި ލުއިތަކެއް ހޯދުމަށެވެ. ރާއްޖެ އަދި ރާއްޖެފަދަ ކުދި ޖަޒީރާ ޤައުމުތަކުން ކުރާ މަސައްކަތުން ހުރިހާ ޤައުމުތަކުން މިކަމަށް ވަނީ އެއްބަސްވެފަ އެވެ. އަދި އެހެންމެ ކްލައިމެޓް ފައިނޭންސިންގެ ދަށުން ލިބޭ އަދި ހަރަދުވާ މިންވަރު ރިޕޯޓް ކުރުމަށް ވަނީ އެއްބަސްވެފަ އެވެ.
ކޮމަން ޓައިމް ފްރޭމް:
ޕެރިސް އެގްރީމަންޓްގެ ދަށުން ޤައުމުތަކުން ލާޒިމް ކުރާ ނެޝަނަލީ ޑިޓާރމިން ކޮންޓްރިބިއުޝަން (އެންޑީސީ) ހުރިހާ ގައުމުތަކުން ކޮންމެ ފަސް އަހަރުގެ ޓާގެޓެއް ހުށައެޅުމަށް ހުރިހާ ޤައުމުތަކުން އެއްބަސްވި އެވެ.
ލޮސް އެންޑް ޑެމޭޖް:
މި ބައްދަލުވުމުގައި ދިވެހިރާއްޖެއާއި ކުދި ޖަޒީރާ ގައުމުތަކުން ވަކާލާތު ކުރަމުންދިޔައީ، މޫސުމީ ބަދަލުތަކުން ލިބޭ އިޔާދަނުކުރެވޭ ވަރުގެ ގެއްލުންތައް (ލޮސް އެންޑް ޑެމޭޖް)އަށް އެހީދިނުމަށް ޕެރިސް އެގްރިމެންޓްގެ ދަށުން ކަނޑައެޅުމަށާއި މި އެހީ ދޭގޮތުގެ މަޢުލޫމާތު ރިޕޯޓްކުރާނެ އުސޫލުތަކެއް ކަނޑައެޅުމަށް ކަމުގައިވީ ނަމަވެސް މިކަން ހާސިލްވެފައެއް ނުވެ އެވެ.
ފައިނޭންސް:
ކްލައިމެޓް ފައިނޭންސިންގ ގެ ދަށުން މި ބައްދަލުވުމުގައި އެއްބަސްވެވުނު ކަންތައްތަކުގެ ތެރޭގައި، ލޮސް އެންޑް ޑެމޭޖަށް ހާއްސަ ފަންޑެއް މި މުއާހަދާގެ ދަށުން އެކުލަވާލުމާބެހޭ މަޝްވަރާތައް ފެށުމާއި، އެޑެޕްޓޭޝަންއަށް ދޭ ފައިސާ ދެގުނަކުރުމަށް އެހީދޭ ގައުމުތަކަށް ގޮވާލުން ހިމެނެ އެވެ.
2020 ވަނަ އަހަރުގެ ނިޔަލަށް އަހަރަކު 100 ބިލިއަން ޔޫއެސް ޑޮލަރު ގައުމުތަކުން ފޯރުކޮށްދިނުމަށް 2009 ވަނަ އަހަރު ކޯޕަންހޭގަންގައި ކަނޑައަޅާފައިވާ ލަނޑުދަނޑި ހާސިލްވެފައި ނުވާތީ މިކަމާ ކަންބޮޑުވުން ފާޅުކޮށް 2025 ވަނަ އަހަރަށް އާ ލަނޑުދަނޑިއެއް
ކަނޑައަޅާނެ ވާރކް ޕްރޮގްރާމެއް ފާސްކުރެވުނެވެ.
މި ޖަލްސާ ނިންމުމުގެ ރަސްމިއްޔާތުގައި ރާއްޖޭގެ ފަރާތުން މިނިސްޓަރ ޝައުނާ ދެއްކެވި ވާހަކަފުޅުގައި މޫސުމީ ބަދަލުތަކުގެ ސަބަބުން ދުނިޔޭގެ ފިނިހޫނުމިން 5.1 ޑިގްރީ އަށްވުރެ ބޮޑަށް އުފުލުނަ ނުދީ ހިފެހެއްޓުމުގެ ލަނޑުދަނޑި ހާސިލްކުރެވޭނެކަމުގެ ޔަގީންކަން ޖަލްސާއިން ލިބިފައި ނުވާތީ މިނިސްޓަރު ހިތާމަފާޅުކުރެއްވި އެވެ.
އެއްބާރުލުމުގެ ރޫހުގައި ކުރިއަށް ދިއުމަށްޓަކައި ޖަލްސާގެ ނިންމުންތައް ބަލައިގަންނަން ރާއްޖެއިން އެއްބަސްވީ ނަމަވެސް މިއީ ދިވެހިންގެ ފުރާނައާ ގުޅިފައިވާ ނިންމުންތަކެއް ކަމަށް މިނިސްޓަރު ވިދާޅުވި އެވެ. އެހެންކަމުން ރާއްޖެއަށާއި ދިވެހިންނަށް ލިބޭނެ އިއާދަނުކުރެވޭ ގެއްލުންތަކަށް އެހީވުމަށް ފައިސާ ލިބޭނެކަމަށް އުއްމީދުކުރައްވާކަމަށް ވެސް މިނިސްޓަރު ވިދާޅުވި އެވެ.
ހަނިމާދޫ އެއާޕޯޓްގައި ސީޕްލޭން ޓާމިނަލެއް ގާއިމްކުރަނީ
ރަޖިސްޓްރީނުކޮށް ހުރި ގޯތިތަކާއި ސާފުނުކުރާ ފަޅު ގޯތިތަކުގެ މައްސަލާގައި ކައުންސިލްގެ ހަރުކަށި އެންގުމެއް
ޑޮލަރު މާރުކުރުމަށް ބަދަލުތަކެއް
ކުޑަކުދިންގެ ޑޮކްޓަރު އަފީފް ކުޅުދުއްފުށީ ހާޖީ މެޑިކަލް ކުލިނިކަށް
