ޑޮކްޓަރީ ބޭހުގެ އެމްއާރުޕީއަށް ޝަކުވާ ހުށަހަޅަން ހުޅުވާލައިފި

ސިއްހީ ހިދުމަތް ދިނުމުގެ ގާނޫނުގައި ޑޮކްޓަރީ ބޭސް ވިއްކޭނެ އެންމެ މަތީ އަގު ނުވަތަ މެކްސިމަމް ރިޓެއިލް ޕްރައިޒް (އެމްއާރުޕީ)ގެ ގޮތުގައި ކަނޑައަޅައިފައިވާ އަގުތަކާ ބެހޭ ގޮތުން ޝަކުވާ ހުށައެޅުމަށް ހުޅުވާލައިފި އެވެ.

ބޭސް އެތެރެ ކުރާ މީހުންނާއި ބޭސްފިހާރަތަކުން ޝަކުވާ ހުށަހަޅަން ހުޅުވައިލާފައިވާއިރު ބޭސް ގަންނަ އަގަށް ގިނަވެގެން ލެވޭނީ 100 ޕަސެންޓް މާކްއަޕެއް ކަމަށް ކަނޑައަޅައި، ރާއްޖެ އިމްޕޯޓުކޮށް ވިއްކާ ހުރިހާ އަސާސީ ބޭހަކަށް، ޖެނުއަރީން ފެށިގެން އެމްއާރުޕީ ތަންފީޒު ކުރަން ވަނީ ހަމަޖައްސައިފައެވެ.

"ސަން" އަށް ދެއްވި އިންޓަވިއުއެއްގައި އޮފިޝަލަކު ވިދާޅުވީ އެމްއާރްޕީ ކަނޑައެޅުމުގެ މަސައްކަތުގެ ތެރެއިން މިހާރު އެންމެ މަތީ އަގު ކަނޑައަޅާފައިވާ އަސާސީ ބޭހުގެ ލިސްޓް، ބޭސް އެތެރެކުރާ މީހުންނާއި ފާމަސީ ތަކުގެ ވެރިންނާ ހިއްސާކޮށްފައިވާ ކަމަށެވެ.

ހުށަހެޅޭ ޝަކުވާތައް އިވެލުއޭޓް ކުރުމަށްފަހު ކަނޑައަޅަފައިވާ އަގަށް ބަދަލެއް ގެންނަޖެހޭނަމަ ކަނޑައެޅިފައިވާ ގަވާއިދުގެ މަތިން އެބަދަލެއް ގެނެވޭނެ ކަމަށް އޮފިޝަލު ވިދާޅުވިއެވެ.