މާޒިޔާއިން ކެނދިކުޅުދޫގައި ފުޓުބޯޅަ އެކަޑަމީއެއް އިފްތިތާހުކޮށްފި

މާޒިޔާ ސްޕޯޓްސް އެންޑް ރެކްރިއޭޝަނާއި ނ.ކެނދިކުޅުދޫ ކައުންސިލް ގުޅިގެން އެ ރަށުގައި ފުޓުބޯޅަ އެކަޑަމީއެއް ގާއިމުކޮށްފިއެވެ.

މި އެކަޑެމީ ލޯންޗް ކުރުމަށް ކެނދިކުޅުދޫގެ ޓާފް ދަނޑުގައި އިއްޔެ ވަނީ ރަސްމިއްޔާތެއް ބާއްވައިފައެވެ. މި އެކަޑެމީ މިއަދު ލޯންޗް ކުރީ، މާޒިޔާގެ ސީނިއާ ޓީމުން އެ ރަށުގައި ކުރަމުންދާ ކޭމްޕުގެ ތެރެއިންނެވެ.

މި އިވެންޓުގައި ވާހަކަ ދައްކަވަމުން މާޒިޔާގެ ޖެނެރަލް ސެކްރެޓަރީ އަބްދުލް ވައްހާބު ވިދާޅުވީ މާޒިޔާއަށް ކެނދިކުޅުދޫގެ ރައްޔިތުންގެ ފަރާތުން ލިބެމުން މިދާ ތަހުނިއްޔާއަށާއި، އެއްބާރުލުމަށް ޝުކުރުދަންނަވާ ކަމަށެވެ.

މާޒިޔާއަކީ ކެނދިކުޅުދޫގައި މިވަގުތު ފެށި ދެވަނަ ފުޓުބޯޅަ އެކަޑަމީއެވެ. މިހާރު އެ ރަށުގައި ހިންގަމުން އަންނަނީ އެ ރަށުގެ ކޮމެޓްސް ސްޕޯޓްސް ކުލަބުން ހިންގާ އެކަޑަމީއެވެ.

މާޒިޔާއިން މިހާރު ކެނދިކުޅުދޫއަށް ކުރަމުންދަނީ 10 ދުވަހުގެ ކޭމްޕެކެވެ. މިފަހުން މާޒިޔާއާ ގުޅުނު އަކްރަމް އަބްދުލް ޢަނީ (އަކޫ) އަދި ހައިޝަމް ހަސަން (ބިޑި) އަދި ނޭޕާލްގެ ގައުމީ ކީޕަރު ކިރަން ކުމާރް ސެމްޝޮން ވެސް ވަނީ ކޭމްޕްގައި ބައިވެރިވެފައެވެ.

މި ކޭމްޕްގައި ކެނދިކުޅުދޫއާއި، މާފަރު ޓީމާއެކު މާޒިޔާއިން އެކުވެރިކަމުގެ މެޗުތަކެއް ކުޅުމަށް ވަނީ ހަމަޖެހިފައެވެ.