ސްޕްރީމް ކޯޓާއި ހައިކޯޓު ވެސް ރިސެސްއަށް

ދިވެހިރާއްޖޭގެ ސުޕްރީމް ކޯޓާއި ހައިކޯޓު ވެސް އަންނަ އަހަރުގެ ޖެނުއަރީ މަހުގެ އެކެއްގެ ނިޔަލަށް ރިސެސްއަށް ހިނގައްޖެ އެވެ.

ޖެނުއަރީ އެކެއްގެ ނިޔަލަށް ރިސެސްއަށް ދިޔަކަމުގައިވީ ނަމަވެސް ދެން ހުޅުވޭނީ ޖެނުއަރީ ދެވަނަ ދުވަހު އެވެ. އެއީ އެއްވަނަ ދުވަހަކީ މީލާދީ އާއަހަރު ފެށޭ ދުވަހަށް ވުމުން އެދުވަހު ސަރުކާރު ބަންދުވުމުންނެވެ.

ރިސެސްގައިވާ މުއްދަތުގައި މައްސަލަތަކުގެ ޝަރީއަތުގެ އަޑުއެހުން ނުބޭއްވި ކަމަށްވީ ނަމަވެސް ކޯޓަށް މައްސަލަތައް ބަލައިގަތުމާއި، އެނޫންވެސް އިދާރީ މަސައްކަތްތައް މެދުކެނޑުމެއް ނެތި ކުރިއަށްދާއިރު ގާނޫނުއަސާސީގެ ނުވަތަ ގާނޫނެއްގެ ދަށުން ވަކި ކަމެއް ވަކި މުއްދަތެއްގެ ތެރޭގައި ނިންމަންޖެހިފައިވާ ހާލަތެއްގައި ނުވަތަ ހުކުމް ކުރުމަށް ނޫނީ ދެ ކޯޓުގައި ވެސް އެއްވެސް އަޑުއެހުމެއް ނޯންނާނެ އެވެ.

ސްޕްރީމް ކޯޓު މިއަހަރު ރިސެސްއަށް ދިޔައިރު އެކޯޓުން އިއްޔެ ވަނީ އެމްއެމްޕީއާރްސީގެ މައްސަލައިގައި ރައީސް އަބްދުﷲ ޔާމީންގެ މަނީ ލޯންޑަރިން ހުކުމުގެ އިސްތިއުނާފް މައްސަލަ ބަލައި އެ މައްސަލައިގައި ދަށު ކޯޓުން ކޮށްފައިވާ ހުކުމް ބާތިލްކޮށްފަ އެވެ.