ކޮންޓިންޖެންސީ ބަޖެޓުން ރައީސް ޔާމީންގެ އިނާޔަތްތަކަށް ހަތަރު މިލިއަން ރުފިޔާ ހަމަޖައްސައިިފި

ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް ލިބެންޖެހޭ އިނާޔަތްތައް އެ މަނިކުފާނަށް ދިނުމަށް ޓަކައި ކޮންޓިންޖެންސީ ބަޖެޓުން އެ މަނިކުފާނުގެ އިނާޔަތްތަކަށް ހަތަރު މިލިއަން ރުފިޔާ ހަމަޖައްސަައިފިއެވެ.

ރައީސް ޔާމީނަށް އިނާޔަތުގެ ގޮތުގައި ކޮންމެ މަހަކު 358،333.33 ރުފިޔާ ލިބޭނެއެވެ.

ދައުލަތުން އަންނަ އަހަރަށް ފާސްކުރި ބަޖެޓުގައި ކުރީގެ ރައީސުންނަށް ދޭން ޖެހޭ އިނާޔަތުގެ ފައިސާ ހަމަޖައްސަައިފައިވަނީ ކުރީގެ ރައީސް މައުމޫނު އަބްދުލްގައްޔޫމަށާއި، ރައީސް މުހައްމަދު ނަޝީދުގެ އިތުރުން ރައީސް ޑރ. މުހައްމަދު ވަހީދު ހަސަން މަނިކަށެވެ.

ނަމަވެސް އިއްޔެ ސުޕްރީމް ކޯޓުންވަނީ އެ މަނިކުފާނުގެ މައްޗަށް ކޮށްފައިވާ ހުކުމް ބާތިލްކޮށްފައެވެ. އެއާއެކު އަލުން އެ މަނިކުފާނަށް ކުރީގެ ރައީސެއްގެ ހައިސިއްޔަތުން ލިބެންޖެހޭ އިނާޔަތްތަކާއި ސެކިއުރިޓީގެ ހިދުމަތް ދައުލަތުން އެ މަނިކުފާނަށް ލިބިގެންދާނެއެެވެ.

ގާނޫނު ބުނާގޮތުން ކުރީގެ ރައީސުންނަށް ލިބޭ އިނާޔަތްތަކުގެ ތެރޭގައި ސެކިއުރިޓީ އާއި ފައިސާގެ އިތުރުން އޮފީހެއް ހިންގުމުގެ ހަރަދު ހިމެނެއެވެ. ޖަލަށް ލާން ހުކުމް ކުރި ހިސާބުން އެ އިނާޔަތްތައް އޮތީ މެދުކެނޑިފައެވެ.