ޕެންޝަން އޮފީހުގެ ހުރިހާ ހިދުމަތެއް އޮންލައިންކޮށް ލިބޭނެ ގޮތް ހަމަޖައްސައިފި

ޕެންޝަން އޮފީހުގެ ހުރިހާ ހިދުމަތެއް އޮންލައިންކޮށް ލިބޭނެ ގޮތް ހަމަޖައްސައިފި އެވެ. މިއީ ހުރިހާ ހިދުމަތެއް ޑިޖިޓަލްކުރި ސަރުކާރުގެ ފުރަތަމަ އިދާރާއެވެ.

ޕެންޝަން އޮފީހުގެ ހުރިހާ ހިދުމަތެއް ޑިޖިޓަލްކޮށް އެކަން ތައާރަފްކުރުމަށް "ކޮށާރު" ގެ ނަމުގައި މިއަދު ވަނީ ޕޯޓަލްއެއް ތައާރަފްކޮށްފަ އެވެ.

މި ޕޯޓަލް ލޯންޗުކޮށްދެއްވީ އިކޮނޮމިކް މިނިސްޓަރު ފައްޔާޒް އިސްމާއިލެވެ. ޕެންޝަން އޮފީހުން ބުނީ މި ޕޯޓަލް މެދުވެރިކޮށް، އެ އޮފީހުންދޭ ހުރިހާ ހިދުމަތްތައް އަވަސްވެ، އިތުރަށް ފުރިހަމަވާނެ ކަމަށެވެ.

މިނިސްޓަރު ފައްޔާޒް ވިދާޅުވީ ރައްޔިތުން އަބަދުވެސް ބޭނުންވަނީ އެންމެ ޒަމާނީ ހިދުމަތްތައް ވީ އެންމެ އަވަހަކަށް ހޯދުން ކަމަށްވާ އިރު އެ ހިސާބަށް ދިއުމަށް އިދާރާތަކުން މަސައްކަތް ކުރަން ޖެހޭނެ ކަމަށެވެ.

ޕެންޝަން އޮފީހުން ތައާރަފް ކުރި މި ސިސްޓަމްގެ އެހީގައި އޮފީހުގެ ހުރިހާ ހިދުމަތްތައް އޮންލައިންކޮށް، ދުނިޔޭގެ ކޮންމެ ތަނަކުން، 24 ގަޑިއިރު މެދުނުކެނޑި ހިދުމަތް ހޯދޭނެ އެވެ.

ވަޒީފާއަދާކުރާ މީހެއް ނަމަ މޯލްޑިވްސް ރިޓަޔަމަންޓް ޕެންޝަން ސްކީމުގައި ރަޖިސްޓްރީވުމާ ހަމައިން، އެ މީހަކަށް ބޭނުންވާ ހިދުމަތްތައް ކަމަށްވާ ޕެންޝަން އެކައުންޓުގެ ތަފްސީލު ބެލުމާއި، ޕޯޓްފޯލިއޯ ބަދަލުކުރުމާއި، އެ މީހަކަށް ސްކީމުން ލިބޭ ބެނެފިޓްސްތަކުގެ ތަފްސީލު ބެލުމާއި، ޕެންޝަން ޕްލޭން ކުރުމަށް ކަލްކިއުލޭޓާ ފަަދަ ޓޫލްތައް ބޭނުންކުރެވޭނެ އެވެ.