އިންތިގާލީ އިންސާފުގެ މައްސަލަތައް ނިންމަން 18 މަސް

އިންތިގާލީ އިންސާފުގެ ގާނޫނުގެ ދަށުން ބަދަލު ހޯދަން ކޯޓަށް ހުށަހަޅާ މައްސަލަތައް ގިނަވެގެން 18 މަސް ދުވަހުގެ ތެރޭގައި ނިންމައި ހުކުމް ކުރަންޖެހޭނެ ކަމަށް އެ އޮފީހުގެ ގަވައިދުގައި ކަނޑައަޅައިފި އެވެ.

މިގޮތަށް ކަނޑައެޅީ މިއަދު ގެޒެޓް ކުރި އިންތިގާލީ އިންސާފުގެ ދަށުން ބަދަލު ނަގައިދިނުމުގައި ކޯޓު ތަކުން އަމަލު ކުރާނެ އިޖުރާއަތުތަކާއި ބަދަލު ނަގައިދޭނެ އަދަދުތަކުގެ މިންގަނޑުތަކުގެ ގަވައިދުގަ އެވެ.

ގަވައިދުގައި ބުނެފައިވަނީ ގެއްލުމުގެ ބަދަލު ހޯދަން ދައުވާކުރަންވާނީ ކޮން ފަރާތަކަށްކަން ކަނޑައަޅާނީ އިންތިގާލީ އިންސާފުގެ ގާނޫނުގެ ދަށުން އުފައްދާފައިވާ އޮމްބަޑްސްޕާސަންގެ އޮފީހުން ކަމަށެވެ. ދަައުލަތުގެ މުއައްސަސާއެއްގެ އިސް ހިންގުންތެރިއެއްގެ ކިބައިން ބަދަލު ނަގައިދިނުމަށް އެދި ކޯޓަށް ހުށަހެޅޭނީ ބަންޑާރަނައިބަށެވެ.

ގަވައިދުގެ ފަސްވަނަ މާއްދާގެ (ށ) ގައިވާ ގޮތުން ސީދާ ގެއްލުމުގެ ބަދަލު ނަގައިދެވޭނީ ތިން ބާވަތެއްގެ އަނިޔާ އަށެވެ. އެއީ މާލީ ގޮތުން ލިބިފައިވާ ސީދާ ގެއްލުމަށާއި، ދާއިމީކޮށް ނަފްސާނީ ގޮތުން ގެއްލުންވުން ނުވަތަ މަރުވުން އަދި ގުނަވަނެއް ނެތިދިޔުން ނުވަތަ ދާއިމީކޮށް ގުނަވަނެއް މަސައްކަތް ނުކުރުން ނުވަތަ އެހެންވެސް ދާއިމީ ޖިސްމާނީ ގެއްލުމެއް ލިބިފައިވާ މައްސަލަތަކުގަ އެވެ.

ލިޔުންތަކާ އެކު ކަނޑައަޅާފައިވާ ކޯޓަށް މައްސަލަ ހުށަހެޅުމުން 18 މަސް ދުވަހުގެ ތެރޭގައި އެ މައްސަލައެއް ބަލައި ނިންމައި ހުކުމް ކުރަންޖެހެ އެވެ.

ނުސީދާ ގެއްލުމުގެ ބަދަލު ނަގައިދެވޭނެ ދާއިރާތަކަކީ ވަޒީފާގެ ފުރުސަތު ފަހިކޮށްދިނުން ނުވަތަ ވަޒީފާގައި ކުރިން ހުރި މަގާމަށް ރުޖޫއަކޮށްދިނުމާއި ސިއްހީ ފަރުވާ ނުވަތަ ނަފްސާނީ ފަރުވާ ފޯރުކޮށްދިނުން އަދި ބޯހިޔާވަހިކަމުގެ ފުރުސަތު ފަހިކޮށްދިނުމެވެ. ގެއްލުން ލިބުނު މީހާ މަރުވެފައިވަނީ ލިބުނު އަނިޔާގެ ސަބަބުންކަން ސާބިތުކޮށްދެވިއްޖެ ނަމަ އަނިޔާ ލިބުނު ފަރާތުގެ ގާނޫނީ ބެލެނިވެރިޔާއަށް އިސްލާމީ ޝަރީއަތުގައިވާ ގޮތުގެ މަތީން މަރުގެ ދިޔަ ނަގައިދެވޭނެ އެވެ.

މިދިޔަ އަހަރު ޑިސެމްބަރުގައި އުފެއްދި އިންތިގާލީ އިންސާފުގެ އޮފީހުގެ މަސައްކަތަކީ ރައީސް މުހައްމަދު އަމީންގެ ވެރިކަމުން ފެށިގެން ރައީސް އަބްދުﷲ ޔާމީންގެ ވެރިކަމާ ހަމައަށް ނިޒާމީ ގޮތެއްގައި ރޭވިގެން ދައުލަތުގެ އިދާރާއަކުން ނުވަތަ އެތަނުގެ ވެރިޔަކު މީހެއްގެ އިންސާނީ ހައްގަކަށް އަރައިގެންފައިވާނަމަ، އެ މައްސަލައެއް ބަލައި އިންސާފު ހޯދައި ދިނުމެވެ. އެ އޮފީހުން މިހާރު އަންނަނީ 400 އަށް ވުރެ ގިނަ މައްސަލަ ބަލަމުންނެވެ.