ކޮވިޑް ހާލަތު ގޯސްވެ ހަނިމާދޫ މޮނިޓަރިންގެ ހާލަތަށް

ފުލޫ ސާމްޕަލްތަކެއް ޕޮޒިޓިވްވެ، ހދ. ހަނިމާދޫގެ ހާލަތު ގޯސްވެ، ހެލްތް ޕްރޮޓެކްޝަން އެޖެންސީ (އެޗްޕީއޭ)އިން އެރަށް މޮނިޓަރިންގެ ހާލަތަށް ގެނެސްފި އެވެ.

މި މަހު ފަސްވަނަ ދުވަހު ރޯގާގެ އަލާމާތްތައް ހުރެގެން އެ ރަށު ސިއްހީ މަރުކަޒަށް ދެއްކި މީހަކު، މި މަހު 6 ވަނަ ދުވަހު ކޮވިޑް-19 އަށް ޕޮޒިޓިވްވެ، އެ ކޭހާ ގުޅިގެން ކޮންޓެކްޓް ޓްރޭޝިންގެ ގޮތުގައި ފާހަގަވި 40 މީހަކު މިހާތަނަށް އެ ބައްޔަށް ޕޮޒިޓިވްވެއްޖެ އެވެ.

އެޗްޕީއޭއިން އެ ރަށް މޮނިޓަރިންގެ ހާލަތަށް ގެނެސްފައިވަނީ މިއަދު އެވެ.

ހަނިމާދޫ ސިއްހީ މަރުކަޒުން ބުނީ މިމަހު 5 ވަނަ ދުވަހު ކޮވިޑަށް ޕޮޒިޓިވްވެފައިވަނީ އެ ރަށު ކެފޭއެއްގައި މަސައްކަތް ކުރާ އަންހެން ކުއްޖެއް ކަމަށެވެ. އެއާއެކު އެ ކެފޭއިން އޭނާގެ ޑައިރެކްޓް ކޮންޓެކްޓުންގެ ގޮތުގައި ކެފޭގައި މަސައްކަތް ކުރާ އިތުރު 3 މީހަކު ވަނީ ޕޮޒިޓިވްވެފައި ކަމަށެވެ.

ހަފުތާއެއްގެ ތެރޭގައި 40 މީހުން ޕޮޒިޓިވްވެ، ހަލުވިކަމާއި އެކު އެރަށުގައި ބަލި ފެތުރޭތީ ހެލްތް ސެންޓަރުން އިލްތިމާސްކުރަނީ ބަލި ކޮންޓްރޯލް ކުރުމަށް ކޮވިޑް ޓާސްކްފޯސްއަށް އެއްބާރުލުން ދީގެން ކޮވިޑުން ރައްކާތެރިވުމަށްދޭ އިރުޝާދުތަކަށް ފުރިހަމައަށް އަމަލުކުރުމަށެވެ.