ދިވެހި ނޫސްވެރިން ތަމްރީނު ކުރަން އިންޑިއާގެ އެހީ ހޯދަން މަޝްވަރާކޮށްފި

ދިވެހި ނޫސްވެރިން ތަމްރީން ކުރުމުގެ ފުރުސަތު އިންޑިޔާ އިން ހޯދުމަށް މޯލްޑިވްސް މީޑިއާ ކައުންސިލް (އެމްއެމްސީ) އިން ރާއްޖޭގައި ހުންނަވާ އިންޑިއަން ހައި ކޮމިޝަނަރު މުނު މަހާވަރާއެކު މަޝްވަރާ ކޮށްފި އެވެ.

އިންޑިއާގެ ހައި ކޮމިޝަންގައި ބޭއްވި ބައްދަލުވުމެއްގައި، ދިވެހި ނޫސްވެރިން އިންޑިޔާ އަށް ފޮނުވައިގެން ތަމްރީނު ޕްރޮގްރާމް ހިންގުމަށާއި އެ ގައުމުގެ ތައުލީމީ ހިދުމަތް ދޭ މަރުކަޒުތަކުގެ މާހިރުން ރާއްޖެ ގެނެސްގެން ތަމްރީނު ޕްރޮގްރާމް ފެށުމަށް އެ ދެ ފަރާތުން މަޝްވަރާކުރި ކަމަށް އެމްއެމްސީން ބުންޏެވެ.

MMC meets with HE Mr. Munu Mahawar, @AmbMunu High Commissioner of India, to discuss opportunities for journalist capacity development with the help of the Indian government. pic.twitter.com/opnuYtehbK

— Maldives Media Council (@mmc_mv) December 28, 2021

އެމްއެމްސީން ބުނީ ދިވެހި ނޫސްވެރިން ތަމްރީނު ކުރުމުގެ ފުރުސަތު ފަހިކޮށްދެއްވާނެ ކަމުގެ ޔަގީންކަން އިންޑިޔާގެ ސަފީރު މުނު މަހާވަރު ދެއްވި ކަމަށެވެ.

އަދި މީޑިއާ ކައުންސިލާއި އިންޑިޔާގެ ޕްރެސް ކައުންސިލާ ގުޅުން ބަދަހިކޮށް، އެ ދާއިރާ އިން ތަމްރީނު ޕްރޮގްރާމް ލިބޭނެ މަގު ފަހި ކުރަން މަސައްކަތް ކުރާނެ ކަމަށް ވެސް ސަފީރު ވިދާޅުވި ކަމަށް އެމްއެމްސީން ބުންޏެވެ.

މި މަޝްވަރާގައި ބައެއް ތަމްރީނު ޕްރޮގްރާމް އޮންލައިންކޮށް ހިންގުމާއި ކުރު މުއްދަތާއި ދިގު މުއްދަތުގެ ސްކޮލަޝިޕް ޕްރޮގްރާމްތަކެއް ދިވެހި ނޫސްވެރިންނަށް ހޯދައިދިނުމަށް މަޝްވަރާ ކުރި އެވެ.