ކޮމަންޑޫ ދާއިރާގެ ބައި އިލެކްޝަންގެ ވޯޓުލާ މީހުންގެ ރަޖިސްޓްރީއަށް ޝަކުވާ ހުށަހެޅުމުގެ ފުރުސަތު ހުޅުވާލައިފި

ކޮމަންޑޫ ދާއިރާގެ ބައި އިލެކްޝަންގައި ވޯޓުލާ މީހުންގެ ރަޖިސްޓްރީއަށް ގެނައި ބަދަލުތަކަށް ޝަކުވާ ހުށަހެޅުމުގެ ފުރުސަތު ހުޅުވާލައިފި އެވެ. ކޮމަންޑޫ ދާއިރާގެ ބައި އިލެކްޝަން އޮންނާނީ އަންނަ ފެބްރުއަރީ މަހުގެ 5 ވަނަ ދުވަހު އެވެ.

އެކަމާއި ގުޅިގެން އިލެކްޝަންސް ކޮމިޝަން(އީސީ)ން ބުނީ 21 ޑިސެމްބަރ ގައި ގެޒެޓްގައި ޝާއިއުކުރި ވޯޓަރސް ލިސްޓަށް ހުށަހެޅި ޝަކުވާތަކަށް ބަލައި ގެނެވުނު ބަދަލުތައް 5 ޖެނުއަރީގައި ޝާއިއުކޮށްފައިވާކަމަށެވެ.

މިލިސްޓަށް ޝަކުވާ ހުށަހެޅުމުގެ ފުރުސަތު ޖަނަވަރީ 06 ވާ ބުރާސްފަތި ދުވަހު ހެނދުނު 08:00ން ފެށިގެން ޖަނަވަރީ 18 ވާ އަންގާރަ ދުވަހުގެ މެންދުރުފަހު 3:00 ނިޔަލަށް ހުޅުވާލާފައިވާކަމަށް އީސީން ބުނެއެވެ. މިލިސްޓު ރައްޔިތުންގެ މަޖިލީހުގެ ކޮމަންޑޫ ދާއިރާގެ ހުރިހާ ރަށެއް ކަމުގައިވާ ށ.ކޮމަންޑޫ، ށ.ފޯކައިދޫ، ށ.މަރޮށީގެ ކައުންސިލުގެ އިދާރާއިން ޢާންމުކޮށް ފެންނަން ހުންނާނެ ކަމަށް އީސީން ބުނެއެވެ.

އީސީން ބުނީ ޝަކުވާ ބަލައިގަތުމަށް ހަމަޖެހިފައިވަނީ ޝަކުވާ ފޯމުންކަމަށެވެ. ޝަކުވާ ބަލައިގަތުމަށް ހަމަޖެހިފައިވަނީ އީމެއިލް މެދުވެރިކޮށް ކޮމިޝަނުގެ އީމެއިލް އެޑްރެސް އިންނެވެ.