ހިލޭ ޕީސީއާރު ހެދޭނެ އިތުރު ގޮތްތައް ހަމަޖައްސަން މަސައްކަތް ކުރާނަން: އެޗްޕީއޭ

މާލެ އައިސް އެނބުރި ރަށަށް ދާން ބޭނުންވާ ފަރާތްތަކަށް ހިލޭ ޕީސީއާރް ޓެސްޓު ހެއްދޭނެ އިތުރު އިންތިޒާމުތައް ހަމަޖެއްސުމަށް މަސައްކަތް ކުރަމުން އަންނަ ކަމަށް އެޗްޕީއޭ އިން މިއަދު ބުނެފި އެވެ.

މިއަދުން ފެށިގެން މާލެ އަތޮޅުތެރެއަށް ފުރޭނީ ކޮވިޑް ޕީސީއާރު ޓެސްޓް ހަދައިގެން ކަމަށް އެޗްޕީއޭ ކުއްލިއަކަށް އެންގުމާއި ގުޅިގެން ގިނަބަޔަކަށް ވަނީ ޓެސްޓް ހެދުމަށް ބޮޑެތި އުނދަގޫތަކާއި ކުރިމަތިލާން ޖެހިފައެވެ.

އެޗްޕީއޭ އިން ކުއްލި ގޮތަކަށް އެ ފިޔަވަޅު އެޅީ މާލެ އާއި ވިލިމާލެ އާއި ހުޅުމާލޭގައި އަނެއްކާވެސް ހަލުވި ސްޕީޑެއްގައި ކޮވިޑް ފެތުރެން ފެށުމުން ރައްކާތެރިކަމުގެ ފިޔަވަޅެއްގެ ގޮތުގަ އެވެ. އެއާއެކު ކޮވިޑަށް ޓެސްޓު ކުރުމަށް ކްލިނިކުތަކުގައި ވަނީ ބޮޑެތި ކިއޫތައް ހަދާލާފައެވެ،

ޕީީސީއާރު ޓެސްޓް ހެއްދުން އެޗްޕީއޭ އިން މަޖުބޫރު ކުރިއިރު، މާލޭގައި ހިލޭ އެ ޓެސްޓު ހެއްދޭ ހަމައެކަނި ތަނަކީ ސޯޝަލް ސެންޓަރުގައި ހަދާފައިވާ މަރުކަޒެވެ.

އެކަމާ ގުޅޭ ގޮތުން ކޮމިޝަނަރު އޮފް ކޮލިޓީ އެޝުއަރެންސް ތަސްލީމާ އުސްމާން "މިހާރު" ނޫހަށް ދެއްވި އިންޓަވިއުއެއްގައި ވިދާޅުވީ ކޮވިޑް ރެންޑޮމް ސާމްޕަލް ނަގަން މާލޭގެ މަގުތަކަށް ނުކުންނަ ވޮލެންޓިއަރުން ވެސް އިތުރު ކުރުމުގެ މަސައްކަތް ކުރަމުން އަންނަ ކަމަށާއި ހިލޭ ޕީސީއާރު ޓެސްޓު ހައްދައިދޭ ތަނެއް ހުޅުމާލޭގައި ގާއިމު ކުރުމުގެ ކަންކަންވެސް ކުރަމުން އަންނަ ކަމަށެވެ.