ކުޅުދުއްފުށީގައި ބަލި ޖެހިފައި ތިބި މީހުންގެ އަދަދު 148 އަށް

ކުޅުދުއްފުށީގައި ކޮވިޑް-19 ޖެހިފައި ތިބި މީހުންގެ އަދަދު 148 އަކަށް އަރައިފި އެވެ. ހޯމަ ދުވަހު އަލަށް ބައްޔަށް ޕޮޒިޓިވްވީ 21 މީހުންނެވެ. އަދި މިއަދު ވަނީ 8 މީހަކު ބަލިން ރަނގަޅުވެފަ އެވެ.

ކުޅުދުއްފުއްޓާއި ހދ އަތޮޅުގެ ގިނަ ރަށްތަކެއްގައި ކޮވިޑް-19 ހަލުވިކަމާއެކު ފެތުރެމުންދާއިރު ހަތަރު ރަށެއް އޮތީ މޮނިޓަރިންގ އަށް ލާފަ އެވެ. އެގޮތުން ހަނިމާދޫ، ނޮޅިވަރަންފަރު، އިތުރުން ނެއްލައިދޫވެސް އޮތީ މޮނިޓަރިންގ އެވެ.

އަދި މި ސަރަހައްދުގެ އެހެން ބައެއް ރަށްތަކަށް ބަލާއިރު ހއ އިހަވަންދޫ އާއި ށ ފުނަދޫވެސް އޮތީ އެޗްޕީއޭގެ ބަންދުގައި އެވެ.

ކޮވިޑް ކޭސްތައް ކުޅުދުއްފުށީގައި އިތުރުވަމުންދާއިރު ބަލީގެ ބޮޑުވަރުވެގެން މިހާތަނަށް ރިޕޯޓްކޮށްފައެއް ނުވެ އެވެ. އެކަމަކު މިފަހުން ގިނަ އަދަދަކަށް ރޭންޑަމް ސާމްޕަލްތައްވެސް ޕޮޒިޓިވްވަމުންދާތީ، ރައްކާތެރިކަމުގެ ފިޔަވަޅުތައް އެޅުމަށް ކަމާ ގުޅުން ހުރި މުވައްސަސާތަކުންދަނީ އިލްތިމާސްކުރަމުންނެވެ.