ބޫސްޓާ ނުޖަހާނަމަ ހައްޖާ އުމްރާއަށް ފުރުސަތު ނުދޭނެ!

އަންނަ މަހުން ފެށިގެން ހައްޖާއި އުމްރާއަށް ދެވޭނީ ބޫސްޓާ ޑޯޒް ޖަހައިގެން ކަމަށް ސައުދީ އަރަބިއާއިން ކަނޑައަޅައިފިއެވެ.

ވެކްސިންގެ ދެ ޑޯޒް ފުރިހަމަ ކުރުމަށް ފަހު 8 މަސް ދުވަސްވުމުން ބޫސްޓާ ޑޯޒް ދަނީ ޖަހަމުންނެވެ. ބޫސްޓާ ޑޯޒް ޖެހުމުން ކޮވިޑުން ރައްކާތެރިވުމަށް ބޮޑު ބާރަކަށްވާ ކަމަށް ކަމާބެހޭ އިދާރާތަކުން ބުނެއެވެ.

މީގެ ކުރިން ސައުދީ އަރަބިއްޔާ އިން އަމަލު ކުރަމުން އައި އުސޫލު ބުނާ ގޮތުން ވެކްސިންގެ ދެޑޯޒް ފުރިހަމަ ކޮށްފައި ވާނަމަ ހައްޖާއި އުމްރާގެ އަޅުކަން އަދާކުރުމަށް އެގައުމަށް ދަތުރު ކުރެވެނެއެވެ. ނަމަވެސް ސައުދީގެ މިނިސްޓްރީ އޮފް އިންޓީރިއާ އިން ކުރި އިއުލާނުގައި ބުނީ އެގައުމުގައި ބޭނުން ކުރަމުން އަންނަ "ތަވައްކަލްނާ" ގައި ވެކްސިން ފުރިހަމަވެފައިވާ ކަމަށް ބަލާ މިންގަނޑު އަންނަ މަހުން ފެށިގެން ބަދަލުވާނެ ކަމަށެވެ.

އަލަށް ގެންނަ ބަދަލަކީ 18 އަހަރުން މަތީގެ މީހުންނަށް ވެކްސިން ފުރިހަމަވެފައިވާ ކަމަށް ބަލައި ގަންނާނީ ވެކްސިންގެ ދެ ޑޯޒް ޖެހިތާ އަށް މަސް ނުވާ ނަމަ ނުވަތަ އަށް މަސް ވެފައިވާ ނަމަ ބޫސްޓަ ޑޯޒް ޖެހުމުންނެވެ.

ސައުދީގައި ބޫސްޑާ ޑޯޒް އަވަހަށް ޖެހުމަށް ބާރު އެޅުމުގެ ގޮތުން، ދެ ޑޯޒް ޖަހައި އަށް މަސް ވެފައިވާ މީހުން ފެސިލިޓީ ތަކަށާއި މީހުން އެއްވެ އުޅޭ ތަންތަނުގެ އިތުރުން މުނިފޫހިފިލުވާ ތަންތަނާއި އެއާޕޯޓް އަދި އާއްމު ދަތުރުފަތުރު ކުރާ ތަންތަނުގައި ވެސް ނޫޅެވޭ ގޮތަށް އެގައުމުގެ މިނިސްޓްރީ އޮފް އިންޓީރިއާއިން ވަނީ ނިންމާފައެވެ.

ރާއްޖޭގައިވެސް ކޮވިޑް ވެކްސިންގެ ބޫސްޓާ ޑޯޒް ދަނީ ޖަހަމުންނެވެ. މިހާތަނަށް 62،402 މީހުން ވަނީ ބޫސްޓާ ޑޯޒް ޖަހާފައެވެ.