ފްލޯޓިން ސިޓީގެ މަސައްކަތް ބައިސަން މޯލްޑިވްސްއާ ހަވާލު ކޮށްފި

ދުނިޔޭގެ ފުރަތަމަ ފްލޯޓިންގ ސިޓީގެ މަޝްރޫއުގެ 5000 ގެ އެޅުމުގެ މަސައްކަތް، ކޮންސްޓްރަކްޝަން ކުންފުނި ބައިސަން މޯލްޑިވްސްއާ ހަވާލުކޮށްފިއެވެ.

މި މަހުގެ 10 ވަނަ ދުވަހުގައި ބޭއްވި ރަސްމިއްޔާތެއްގައި ޑަޗް ޑޮކްލޭންޑް ކުންފުނިން ބައިސަން މޯލްޑިވްސްއަށް 5000 ޕްލޯޓިން ހައުސިން އަޅަން ވަނީ ހަވާލުކޮށްފަ އެވެ. އެތަން އަޅަނީ މާލެއާއި ފަސް މިނެޓު ދުރުގައި އޮންނަ ވިލެއްގަ އެވެ.

ބައިސަން އިން ބުނީ މި މަޝްރޫއުގެ ފުރަތަމަ ގެތައް ނިމޭނީ ރޯދައިގެ ފަހުން ކަމަށެވެ. އަދި އެ ގެތައް ނިމުމާއެކު އާންމުންނަށް އެތަން ބަލާލުމުގެ ފުރުސަތު ހުޅުވާލާނެ ކަމަށް ވެސް އެ ކުންފުނިން ބުނެއެވެ.

ރާއްޖޭގައި ފްލޯޓިންގ ސިޓީއެއް ތަރައްޤީ ކުރުމަށް އެންމެ ފުރަމަތަ އެއްބަސްވުމަކަށް އައިސްފައިވަނީ 2010 ވަނަ އަހަރު ރައީސް ނަޝީދުގެ ވެރިކަމުގައެވެ. އޭރު ޑަޗް ޑޮކްލޭންޑް ކުންފުންޏާއި މަސައްކަތް ހަވާލުކުރުމަށްފަހު، ކުރިއަށް ނުގޮސް އޮވެ، މިއެއްބަސްވުމުގައި ދެވަނަ ފަހަރަށް ސޮއި ކުރީ 2019 ވަނަ އަހަރު މޭއި މަހުގެ ތެރޭގައެވެ. މިމަޝްރޫއު ހިންގުމަށް ދެވަނަ ފަހަރަށް ވެސް ހަވާލުކުރި ޑަޗް ޑޮކްލޭންޑް ކުންފުންޏާއެވެ.

ފްލޯޓިން ސިޓީގެ އިމާރާތްތައް ހުންނާނީ އެއް އިމާރާތް އަނެއް އިމާރާތާ ގުޅިފައި ކަމަށާއި، އަދި ހުރިހާ އިމާރާތްތައް ވެސް ހުންނާނީ ފަޅުގެ އަޑިން ބިމުގައި ހަރުކުރެވިފައި ކަމަށް ވެސް ބައިސަން އިން ބުންޏެވެ.

އެ ކުންފުނިން ބުނީ ފްލޯޓިން ސިޓީ ބިނާ ކުރަނީ މާލެއިން ފުރައިގެން ފަސް މިނެޓުން ދެވޭ ފަޅެއްގައި ކަމަށެވެ. އަދި މުޅިއެކު 5000ގެ އެ ސިޓީގައި އެޅުމަށް ހަމަޖެހިފައިވާ ކަމަށް ވެސް ބުންޏެވެ.

މިމަޝްރޫޢު ލޯންޗްކޮށްފައިވަނީ 14 މާރޗް 2021 ގައެވެ. އެ ރަސްމީއްޔާތުގައި ޓޫރިޒަމް މިނިސްޓަރު އަބްދުﷲ މައުސޫމާއި ރައްޔިތުންގެ މަޖިލީހުގެ ރައީސް މުހައްމަދު ނަަޝީދު ބައިވެރިވެ ވަޑިގެންނެވިއެވެ.

ބިލިއަނެއްހާ ޑޮލަރުގެ މިމަޝްރޫއުގެ ދަށުން، 5000 ހައުސިން ޔުނިޓު މިރަށުގައި އަޅާއިރު މިކަމައްޓަކައި މާލެ އަތޮޅު އާރަށް ކައިރިން 200 ހެކްޓަރުގެ ފަޅެއް ޑަޗް ޑޮކްލޭންޑް ކުންފުންޏަށް ވަނީ ދީފައެވެ.

މިމަޝްރޫއުގެ ދަށުން ޔޮޓް މެރީނާ އަދި ރިސޯޓުވެސް ޤާއިމު ކުރުމަށް ވަނީ ހަމަޖެހިފައެވެ. މިމަޝްރޫޢުގެ ދަށުން އަޅާ ހައުސިންގް ޔުނިޓްތަކަކީ މެދު ފަންތީގެ އަގުތަކުގައި ހިމެނޭ ހައުސިންގ ޔުނިޓްތަކަށް ވާނެއެވެ. މުޅިން ތަފާތު ކޮންސެޕްޓަކަށް ހަދާ މި ގެތަކުގައި މިޑްލް ރޭންޖުން ހައި-އެންޑްގެ ގެތައް ހުންނާނެ އެވެ. މިތަނުގައި ހަދާ ގެތަކުގެ އަގު އުޅޭނީ ދެ މިލިއަން ރުފިޔާ އިން މަތީގައި ކަމަށް މި ޕްރޮޖެކްޓްގެ ލޯކަލް ކޮންސަލްޓެންޓް އިބްރާހިމް ރިޔާޒް ވިދާޅުވި އެވެ. މި ސިޓީން ގެ ގަތުމަށްޓަކާއި އިންސްޓޯލްމެންޓް އުސޫލުގެ ތެރެއިން ގެ ގަތުމުގެ ފުރުސަތު އޮންނާނެ އެވެ. މީގެ އިތުރުން މޯގޭޖް އުސޫލުން ލޯނު ނަގައިގެން ވެސް މި ސިޓީން ގެ ގަތުމުގެ ފުރުސަތު އޮންނާނެއެވެ.

ފްލޯޓިންގް ސިޓީ އަޅާއިއިރު މުޅިންވެސް ތިމާވެއްޓާއި ރަހުމަތްތެރި ގޮތްތަކެއް ބޭނުން ކުރެވޭނެއެވެ. އަދި މިއީ ރާއްޖޭގައި ހިންގާ މިފަދަ ފުރަތަމަ މަޝްރޫއެއެވެ. މިއީ ރާއްޖޭގެ ގެދޮރު އިމާރާތް ކުރުމުގެ ދާއިރާ ބަދަލު ކޮށްލުމުގެ މަޤްސަދުގައި ކުރިއަށްގެންދާ ބިޔަ މަޝްރޫއެކެވެ.