ވެރިޔަކު ނެތި ގިނަ ދުވަސްތަކެއްވުމަށްފަހު، ކުޅުދުއްފުށީގައި ހުންނަ ހދ އަތޮޅު ތައުލީމީ މަރުކަޒަކަށް ޕްރިންސިޕަލަކު ހަމަޖައްސަވައިފި އެވެ.
އަތޮޅުތެރޭގެ އެންމެ އާބާދީ ބޮޑު އެއް ސްކޫލުގެ ޕްރިންސިޕަލްގެ މަގާމަށް ހަމަޖެއްސެވި، މުހައްމަދު މަތީން، ކުޅުދުއްފުއްޓަށް ވަޑައިގެން ވަޒީފާއަށް ނުކުންނަވަން ފެއްޓެވީ މިދިޔަ ހަފްތާގައި އެވެ.
އެ ސްކޫލަށް ޕްރިންސިޕަލަކު ލިބިފައިމިވަނީ ވެރިޔަކު ނެތިގެން އެކަމުގެ ކަންބޮޑުވުން ބެލެނިވެރިން އުފުލާފައިވަނިކޮށެވެ.
ޕްރިންސިޕަލް މަތީން އެންމެ ފަހުން ހުންނެވީ ށ ފޯކައިދޫ ސްކޫލުގެ ޕްރިންސިޕަލެއްގެ މަގާމުގައި އެވެ. އޭނާ އެ ސްކޫލަށް ހިދުމަތްކުރެއްވި މަދު އަހަރުކޮޅުގައި ބޮޑެތި ކާމިޔާބީތަކެއް ވަނީ ހާސިލްކޮށްފަ އެވެ.
ހދ އަތޮޅު ތައުލީމީ މަރުކަޒަކީ ފައުންޑޭޝަން ގުރޭޑުން ފެށިގެން ގުރޭޑް 10 ކިޔަވައިދޭ ސްކޫލެކެވެ. އެ ސްކޫލުގައި މިއަހަރު 900 އަށްވުރެގިނަ ދަރިވަރުން ދަނީ ތައުލީމް ހާސިލުކުރަމުންނެވެ.
