ކުޑަކުދިންނަށް ދޭ ބާވަތްތައް ވިއްކަން ބަހައްޓަން ވާނީ ރަޖިސްޓްރީކޮށްގެން

ކުޑަކުދިންނަށް ދޭ ބާވަތްތައް ރާއްޖެއަށް އެތެރެކުރުމާއި، އުފެއްދުމާއި، ވިޔަފާރީގައި ބޭނުންކުރުމުގައި އަމަލުކުރާނެ ގޮތުގެ ގަވައިދާ ހިލާފަށް އެފަދަ އުފެއްދުންތައް ނުވިއްކުމަށް ހެލްތު މިނިސްޓްރީން އަންގައިފި އެވެ.

މިކަން ހާމަކޮށްފައި ވަނީ މިއަދު އެ މިނިސްޓްރީން އާންމު ކޮށްފައިވާ "ގާތުންދޭ ކިރުގެ ބަދަލުގައި ކުޑަކުދިންނަށް ދޭ ބާވަތްތައް ދިވެހިރާއްޖެއަށް އެތެރެކުރުމާއި، އުފެއްދުމާއި، ވިޔަފާރީގައި ބޭނުންކުރުމުގައި އަމަލުކުރާނެ ގޮތުގެ ގަވައިދު" ގަ އެވެ.

ތިން އަހަރުން ދަށުގެ ކުޑަކުދިންނަށް ހާއްސަ ކިރުގެ ބާވަތްތަކާއި، އެއް އަހަރުން ދަށުގެ ކުޑަ ކުދިންނާއި މާބަނޑު އަންހެނުންނަށާއި، ގާތުން ކިރުދޭ މައިންނަށް ހާއްސަކޮށް ތައްޔާރުކޮށްފައިވާ ކާނާގެ ބާވަތްތަކާއި އަދި ބުއްފުޅިއާއި ބުއްފުޅީގެ ތުން ވިއްކަން ބަހައްޓަން ވާނީ ގަވައިދާ އެއްގޮތަށް ރަޖިސްޓްރީކޮށް، ރަޖިސްޓްރީކުރި އުސޫލުތަކާއި ހިލާފު ނުވާ ގޮތަށް ކަމަށް އެ ގަވައިދުގައި ބުނެވެ.

ގަވައިދުގެ މަގުސަދަކީ ޅަފަތުގެ ކުދިން އަދި މާބަނޑު އަންހެނުންނާއި ގާތުން ކިރުދޭ މައިންގެ ދުޅަހެޔޮ ސިއްހަތަށާއި، ރައްކާތެރި އަދި އެދެވިގެންވާ ކާނާ ލިބިގަތުމަށް މަގުފަހިކޮށްދިނުމެވެ.

މިފަދަ އުފެއްދުންތައް މާކެޓުގައި ވިއްކަން ބަހައްޓާނަމަ އެ ތަކެތީގެ ލޭބަލްގައި ކޮންމެހެން ހުންނަން ޖެހޭނެ ޝަރުތުތައް ވެސް އެ މިނިސްޓްރީން މި ޤަވައިދުގައި ވަނީ ހިމަނާފައެވެ.

އުފެއްދުންތަކުގެ ލޭބަލްގައި ހުރުން ލާޒިމު މައުލޫމާތު

ގާތުންދޭ ކިރުގެ ބަދަލުގައި ކުޑަކުދިންނަށް ދޭ ބާވަތްތައް ނުވަތަ އުފެއްދުންތައް މާކެޓުގައި ވިއްކާއިރު އެފަދަ އުފެއްދުންތަކުގެ ލޭބަލްގައި އިތުރު ބައެއް މައުލޫމާތު ހުންނަންވާނެ ކަމަށްވެސް ގަވައިދުގެ ހަތްވަނަ މާއްދާގައިވެ އެވެ.

ހެލްތު މިނިސްޓްރީން މިއަދު ބުނީ ގަވައިދުގައި ބަޔާންކޮށްފައިވާ ކަންކަމާއި އަދި ރަޖިސްޓްރީ ކުރުމުގެ އުސޫލުތަކާއި މިންގަޑުތަކާއި ހިލާފަށް މިފަދަ ތަކެތި ވިއްކަމުންދާކަން ފާހަގަކުރެވިފައިވާ ކަމަށެވެ. ވުމާއިއެކު ބަޔާންކޮށްފައިވާ ކަންތައްތަކާއި ޚިލާފަށް އެ ފަދަ އުފެއްދުންތައް ވިއްކަން ބެހެއްޓުމާއި، ވިއްކުމާކީ މަނާ ކަމެއް ކަމުގައި ހެލްތު މިނިސްޓްރީން ވަނީ ބުނެފަ އެވެ.