ބާރު ސްޕީޑުގައި ދުއްވާފައި ދިޔަ ސައިކަލެއް ހޮޅިދަނޑިއެއްގައި ޖެހި އަލިފާން ރޯވެއްޖެ

ކުޅުދުއްފުށީގައި ބާރު ސްޕީޑުގައި ދުއްވާފައި ދިޔަ ސައިކަލެއް ކޮންޓްރޯލު ނުވެގެން ހޮޅިދަނޑިއެއްގައި ޖެހި އަލިފާން ރޯވެއްޖެ އެވެ.

މި އެކްސިޑެންޓް ހިނގާފައިވަނީ މިއަދު ހެނދުނު 9:36 އެއް ހާއިރު އަމީނީމަގު، ސްޓޭޑިއަމް ވޮލީކޯޓާ ހިސާބުގައި އެވެ.

މަންޒަރު ދުށް މީހަކު ކޭއޯއަށް މައުލޫމާތު ދެމުން ބުނީ މި އެކްސިޑެންޓް ހިނގާފައިވަނީ އަމީނީ މަގުން އުތުރުން ދެކުނަށް ބާރު ސްޕީޑުގައި ދުއްވާފައި ދިޔަ ސައިކަލެއް ކޮންޓްރޯލުނުވެ ގޮސް މަގު މެދުގައި ހުރި ހޮޅިދަނޑިއެއްގައި ޖެހިގެން ކަމަށެވެ. "ހޮޅިދަނޑީގައި ޖެހުނު ތަނާހެން ސައިކަލު ދުއްވަން އިން މީހާ ވިއްސައިގެން ގޮސް އެތާއޮތް ކާރެއް ކައިރިއަށް ޖެހުނީ" މަންޒަރު ދުށް މީހާ ބުންޏެވެ.

ކުޅުދުއްފުށީ ރީޖަނަލް ހޮސްޕިޓަލުގެ އޮފިސަލަކު ކޭއޯއަށް މައުލޫމާތު ދެއްވަމުން ވިދާޅުވީ އެކްސިޑެޓްވި ޒުވާނާއަށް ސީރިއަސް އަނިޔާއެއް ނުވާކަމަށާއި ލިބިފައިވަނީ ކުދި އަނިޔާ ކަމަށެވެ. އޭނާއަށް ކޭއާރުއެޗުގައި ފަރުވާދެމުން އަންނަ ކަމަށް އޮފިސަލު ވިދާޅުވި އެވެ.

އެމްއެންޑީއެފުން ކޭއޯއަށް މައުލޫމާތު ދެއްވަމުން ވިދާޅުވީ މިއެކްސިޑެންޓުގެ މައުލޫމާތު އެމްއެންޑީއެފްއަށް ލިބިފައިވަނީ 9:36 ގައި ކަމަށާއި ރޯވެފައިވާ އަލިފާން ގަނޑު ނިއްވާލެވިފައިވަނީ 9:41 ގައި ކަމަށެވެ.