އިހަވަންދިއްޕޮޅުގެ ބަނދަރު ފިޔަވަހިތަކަކަށް ބަހާލައިގެން މަސައްކަތް ފެށުމަށް ނިންމައިފި

އިހަވަންދިއްޕޮޅުގެ ބަނދަރުގެ މަސައްކަތް ފެށުމަށް ހުރި ހުރަސްތައް ނައްތާލައި ފިޔަވަހި ތަކަކަށް ބަހާލައިގެން އެ މަސައްކަތް ފެށުމަށް ރައްޔިތުންގެ މަޖިލީހުގެ އިގްތިސާދީ ކޮމިޓީން ނިންމައިފިއެވެ.

އިހަވަންދިއްޕޮޅު ބަނދަރުގައި އާގު ބޯޓު ފަހަރަށް ޚިދުމަތް ދެވޭނެ މަގު ތަނަވަސްކޮށްދިނުމަށް އެދި ހޯރަފުށީ ދައިރާގެ މެމްބަރު އަހުމަދު ސަލީމް ހުށަހަޅުއްވާފައިވާ ގަރާރު ދިރާސާ ކުރުމަށް ބޭއްވި ކޮމިޓީ ބައްދަލުވުމުގައި ނިންމާފައިވަނީ އިތުރު ދިރާސާއެއް ކުރުމަކާ ނުލައި، ބޭރު ބަޔަކަށް މަސައްކަތް ދިނުމުގެބަދަލުގައި ދިވެހި ކުންފުންޏަކާ ހަވާލުކޮށްގެން ބަނދަރުގެ މަސައްކަތް ކުރިއަށް ގެންދިޔުމަށެވެ.

މި ކޮމެޓީގައި ވާހަކަދައްކަވަމުން މިލަންދޫ ދާއިރާގެ މެމްބަރު އަލީ ރިޒާ ވިދާޅުވީ އިހަވަންދިއްޕޮޅުގައި ގާއިމްކުރެވޭ ބަނދަރުން އިގްތިސާދަށް ބޮޑު ފައިދާއެއް ކުރާނެކަމަށާއި ކުރިއަށް އޮތް 15 އަހަރުގެ ތެރޭގައި އެންމެ ބޮޑު ފައިދާއެއްކޮށް ދައުލަތަށް އެންމެ ގިނަ ފައިސާ ވަންނަ ދެވަނަ އިންޑަސްޓްރީއަށްވާނެ ކަމަށެވެ.

ވިދާޅުވީ އިހަވަންދިއްޕޮޅުގެ ބަނދަރު ތަރައްގީ ކުރުމުގެ މަސައްކަތް ފެށުމަށް ލަސްވެފައިވާކަން އެންމެންވެސް ގަބޫލުކުރާ ކަމަށާއި، މި މަސައްކަތް ފެށުމަށްޓަކައި މިހާރު ކަމާގުޅުން ހުރި ހުރިހާ އިދާރާއަކާ މަޝްވަރާ ކުރެވިފައިވާ ކަމަށެވެ. އެގޮތުން ޓްރާންސްޕޯޓް މިނިސްޓްރީއާއެކު ކުރެވުނު މަޝްވަރާތަކުން މި މަސައްކަތް ކުރުމަށް ގަވާއިދަށް ބަދަލުތަކެއް ގެންނަން ޖެހޭކަން ފާހަގަކުރެވިފައިވާ ކަމަށް މެމްބަރު ވިދާޅުވިއެވެ.

މެމްބަރުގެ ރިޒާގެ ވާހަކަތަކަށް އެހެން މެމްބަރުން ވެސް ވަނީ ތާއީދު ކުރައްވައި ވާހަކަދައްކަވާފައެވެ. އެގޮތުން މެމްބަރުން ފާހަގަކުރެއްވި ކަންކަމުގައި މި މަސައްކަތް ކުރުމަށް ދިވެހި ކުންފުންޏަކާ ހަވާލުކުރުމުގެ މުހިންމު ކަމަށް އަލިއަޅުއްވާލެއްވިއެވެ. އަދި ފޭސްތަކަކަށް ބަހާލައިގެން މަސައްކަތް ކުރުމަކީ އެންމެ ރަނގަޅު ގޮތްކަމުގައި ނިންމިއެވެ.

ގަރާރުގައި ބުނެފައިވަނީ، ރާއްޖެއަކީ ހުޅަނގާއި އިރުން މުދާ ހިފައިގެންދާ އާގުބޯޓު ފަހަރު، ދަތުރުކުރާ މަގުގައި އޮތް ގައުމަކަށްވެފައި، ޚާއްސަކޮށް ރާއްޖޭގެ އުތުރުގައި އޮތް 8 ޑިގްރީ ޗެނަލަކީ ކާގޯ ބޯޓުފަހަރު ހުރަސްކުރާ ޗެނަލަކަށްވާތީ، މިކަމުން ހޯދެން އޮތް ނަފާ ހޯދުމަކީ، މި ސަރަހައްދުގެ އެހެން ގައުމުތަކެކޭ އެއްގޮތަށް އަމާޒު ހިފިދާނެ ސިނާއަތެއް ކަމަށެވެ. ބޭރުގެ އާގުބޯޓުފަހަރަށް ޚިދުމަތް ދިނުމުގެ ސިނާއަތެއް މިހިނދުން މިހިނދަށް ގާއިމުކުރުމަކީ، ބޭނުންތެރިކަމެއް ކަމަށް ގަރާރުގައި ފާހަގަކޮށްފައިވެއެވެ.