އިއާދަކުރަނިވި ހަކަތަ ބޭނުންކޮށްގެން ކަރަންޓު ދިން ފުރަތަމަ ރަށަކަށް ކުރިނބީ

އިއާދަކުރަނިވި ހަކަތަ ބޭނުންކޮށްގެން ކަރަންޓްގެ ހިދުމަތް ފޯރުކޮށްދިން، މީހުން ދިރިއުޅޭ ފުރަތަމަ ރަށަކަށް ހދ. ކުރިނބީ ވެއްޖެ އެވެ.

"އަވަސް" އަށް ދެއްވި އިންޓަވިއުއެއްގައި ކުރިނބީ ކައުންސިލްގެ ރައީސް އަބްދުﷲ އަސްލަމް ވިދާޅުވީ ރަށުގައި ފެނަކަ އިން ބޭނުންކުރާ ތިން އިންޖީނު ނިއްވާލުމަށްފަހު ސޯލާތަކުން އުފައްދާފައިވާ ކަރަންޓްގެ ހިދުމަތް ދިން ނަމަވެސް އެއްވެސް ކަހަލަ ތަފާތެއް ފާހަގަކުރެވިފައި ނުވާ ކަމަށެވެ.

ރާއްޖޭގައި މީހުން ދިރިއުޅޭ ބައެއް ރަށްތަކުގައި ސޯލާ ޕެނަލްތައް ހަރުކޮށްގެން އިރުގެ އަލިން ކަރަންޓް އުފެއްދުމަށް އަމާޒުކޮށްގެން އޭޑީބީ އާއި ދިވެހި ސަރުކާރު ގުޅިގެން ގެންދަނީ "ޕްރިޕެއަރިން އައުޓާ އައިލެންޑްސް ފޯ ސަސްޓެއިނެބަލް އެނާޖީ ޑިވެލޮޕްމެންޓް (ޕޮއިސްޑް)"ގެ ނަމުގައި މަޝްރޫއެއް ހިންގަމުންނެވެ.

މިމަޝްރޫއުގެ ދަށުން ކުރިނބީގައި ހަދާފައިވާ ހަ ހަޓެއްގައި ސޯލާ ޕެނަލްތައް ހަރުކޮށް ނިންމާލީ މިދިޔަ އަހަރުގެ ތެރޭގަ އެވެ. ކުރިނބީގެ ސޯލާ ސިސްޓަމް ޓެސްޓް ކުރުމުގެ ގޮތުން އެރަށުގެ އިންޖީނުތައް ނިއްވާލުމަށްފަހު ސޯލާ ތަކުން އުފައްދާފައިވާ ކަރަންޓްގެ ހިދުމަތް މިދިޔަ ބުރާސްފަތި ދުވަހު ވަނީ މުޅި ރަށަށް ދީފަ އެވެ. އެކަމަކު އެއީ ތަޖުރިބާކޮށްލުމުގެ ގޮތުން 30 މިނެޓަށް ދިން ހިދުމަތެކެވެ.