މިދިޔަމަހު އެކްސްޕޯޓް ކުރި މުދަލުގެ އަގު 29 ޕަސެންޓު އިތުރު

މިދިޔަ މަހު ރާއްޖެއިން އެކްސްޕޯޓު ކުރެވުނު މުދަލުގެ އަގު މިދިޔަ އަހަރުގެ ފެބްރުއަރީ މަހާ އަޅާ ބަލާއިރު 29 ޕަސެންޓު އިތުރުވެެއްޖެއެވެ.

މިދިޔަ މަހު، ރާއްޖެއިން އެންމެ ގިނަ އަދަދަކަށް ބޭރުކޮށްފައިވަނީ ގަނޑުކުރި ކަޅުބިލަމަހުގެ ބާވަތްތަކެވެ. އެ ބާވަތްތަކުގެ 149 މިލިއަން ރުފިޔާގެ މުދާ ބޭރުކުރި އިރު، ކަޅުބިލަމަހުގެ އެހެނިހެން އުފެއްދުންތަކުން ބޭރުކުރީ 25 މިލިއަން ރުފިޔާގެ މުދަލެވެ.

މީގެ އިތުރުން، 17 މިލިއަން ރުފިޔާގެ ރީނދޫ އުރަހަ ކަންނެލި ދަޅުގައި ބަންދުކޮށްގެން ބޭރުކުރިއިރު، އޭގެ އެހެނިހެން އުފެއްދުންތަކުގެ 25 މިލިއަން ރުފިޔާގެ މުދާ ބޭރުކުރިއެވެ.

ކަސްޓަމްސްގެ ތަފާސް ހިސާބުތަކުން ދައްކާގޮތުން، މިދިޔަ މަހު 309 މިލިއަން ރުފިޔާގެ މުދާ އެކްސްޕޯޓުކޮށްފައިވެއެވެ. މިދިޔަ އަހަރުގެ މި މުއްދަތުގައި ބޭރުކުރެވުނީ 239 މިލިއަން ރުފިޔާގެ މުދަލެވެ.

މިދިޔަ މަހު ރާއްޖެއިން އެންމެ ގިނަ މުދާ އެކްސްޕޯޓު ކުރީ ތައިލެންޑަށެވެ. އެގޮތުން ޖުމްލަ އެކްސްޕޯޓުގެ 56 ޕަސެންޓު ފޮނުވާފައި ވަނީ އެގައުމަށެވެ. ދެވަނައަށް އެންމެ ގިނަ މުދާ ބޭރުކުރީ ޖަރުމަނާއި އިނގިރޭސިވިލާތަށެވެ. އެއީ ހަތް ޕަސެންޓުގެ މުދަލެވެ.