ދަނޑުވެރިކަމަށާއި، ވިޔަފާރީ އެހީ ލޯނަށް ހުޅުވާލަނީ

ކުދި އަދި މެދުފަންތީގެ ވިޔަފާރި ތަރައްގީ ކުރަން އުފެއްދި، އެސްއެމްއީ ޑިވްލޮޕްމަންޓް ކޯޕަރޭޝަން (އެސްޑީއެފްސީ) އިން ލޯނަށް އެދުމުގެ ފުރުސަތު ހުޅުވާލަން ނިންމައިފި އެވެ.

ސަރުކާރާއި ބައެއް ސިޓީ ކައުންސިލްތައް ހިއްސާ ވެގެން އުފައްދާފައިވާ ބޭންކް، އެސްޑީއެފްސީގެ މިދިޔަ އަހަރުގެ މާލީ ކާމިޔާބުތަކުގެ މައްޗަށް ބުނެފައިވާ ގޮތުން މުޅި ރާއްޖޭގެ ހުރިހާ އަތޮޅެއް ހިމެނޭގޮތަށް 144 ރަށެއްގައި ވިޔަފާރި ހިންގާ ކުރިއެރުވުމަށް އެސްޑީއެފްސީ އިން ވަނީ ލޯނު ދޫކޮށްފަ އެވެ.

އެސްޑީއެފްސީން ރޭ ބުނީ ދަނޑުވެރިކަމަށް ދޫކުރުމަަށް ހަމަޖެހިފައިވާ "ދަނޑުވެރި ނަފާ" ލޯން އާއި "ވިޔަފާރި އެހީ" ލޯނަށް މިއަދު ހުޅުވާލާނެ ކަމަށެވެ. އެ ދެ ލޯނަށް އެދޭ ފޯމް މާދަމާއިން ފެށިގެން ހުށައެޅޭނެ ކަމަަށްވެސް ބުންޏެވެ. ލޯނަށް ކުރިމަތިލާން ބޭނުންވާ މީހުންނަށް އެކުންފުނީގެ ވެބްސައިޓް މެދުވެރިކޮށް ފޯމު ހުށަހެޅޭނެ އެވެ. އަދި އެސްޑީއެފްސީ އިން ދޫކުރާ އެހެން ލޯނުތަކަށް މެއި މަހު ހުޅުވާލާނެ ކަމަށް ވެސް ވަނީ ބުނެފައެވެ.

އެސްޑީއެފްސީ އިން ވަނީ 2،205 ފަރާތަކަށް 381 މިލިއަން ރުފިޔާގެ ލޯނުއެހީ ދޫކޮށްފަ އެވެ. އަދި މި ލޯނުތަކުގެ ސަބަބުން ވިޔަފާރިތަކަށާއި އާމްދަނީ ހޯދުމަށް އަމިއްލަ މަސައްކަތްކުރާ ފަރާތްތަކަށް ދިމާވެފައިވާ މާލީ ދަތިތަކަށް ލުޔެއް ލިބި، އެ ފަރާތްތަކަށް ދިމާވެފައިވާ ގޮންޖެހުން ތަކުން އަރައިގަތުމަށް ވަނީ އެހީއަކަށްވި އެވެ.

އެ ބޭންކުން ބުނި ގޮތުގައި މީގެ އިތުރުން އެންމެ ކުދި، ކުދި އަދި މެދު ފަންތީގެ ވިޔަފާރިތަކަށް ބޭނުންވާ މާލީ އެހީތެރިކަން ފޯރުކޮށްދިނުމުގެ ގޮތުން މިދިޔަ އަހަރު ލޮކްޑައުންނަށްފަހު ކުންފުނީގެ އޮޕަރޭޝަންސް ފަށާ، ކޮވިޑުގެ ނާޒުކު ހާލަތުގައި ވެސް އިތުރު 305 ފަރާތަކަށް ޖުމްލަ 420 މިލިއަން ރުފިޔާގެ ލޯނު ދީފައިވާ ކަމަށެވެ.