އުމްރާއަށް ގޮސް އުޅުނު ދިވެއްސަކު ނިޔާވެއްޖެ

އުމްރާގެ އަޅުކަން އަދާކުރުމަށް ސައުދީ އަރަބިއްޔާގެ މައްކާއަށް ގޮސް އުޅުނު ދިވެއްސަކު ނިޔާވެއްޖެއެވެ.

ނިޔާވެފައިވަނީ އުމުރުން 71 އަހަރުގެ ސަޢީދު ޔޫސުފް ނަމަކަށް ކިޔާ ދިވެހި ފިރިހެނެކެވެ. އޭނާ އުމްރާއަށް ދިޔައީ ޒަމްޒަމް ޙައްޖު އެންޑް ޢުމްރާ ޓްރެވަލްގެ ހަވާލުގައެވެ. ޒަމްޒަމް ގްރޫޕުގެ ހަވާލުގައި ސަޢީދު ޔޫސުފް ޢުމްރާއަށް ގޮސްފައިވަނީ މިދިޔަ ރަމަޟާންމަހުގެ ތެރޭގައެވެ.

ސައީދުބެ ނިޔާވެފައިވާކަން އިއުލާނުކޮށްފައިވަނީ، އުމްރާގެ މަތިވެރި އަޅުކަން އަދާ ކުރުމަށް އޭނާ ދިޔަ "ޒަމްޒަމް ޙައްޖު އެންޑް އުމްރާ ޓްރެވެލް" ގެ ފަރާތުންނެވެ.

ސަޢީދު ޔޫސުފް ނިޔާވީ، އޭނާގެ ހާލު ދެރަވެ، މައްކާގެ ކިންގް ފައިސަލް ހޮސްޕިޓަލުގައި ފަރުވާ ހޯދަމުންދަނިކޮށް މިއަދުގެ ވަގުތެއްގައިކަމަށް އެ ގްރޫޕުން ވަނީ ހާމަކޮށްފައެވެ.

އުމްރާގެ މާތް އަޅުކަމަށް ގޮސް އުޅެނިކޮށް މިދިޔަ މަހުގެ ފަހުކޮޅު ވެސް މީހަކު ނިޔާވިއެވެ. ނިޔާވެފައި ވަނީ ބ. އޭދަފުށި ބަގީޗާގޭ/ އަބޫބަކުރު ހަސަންއެވެ. އޭނާގެ ނިޔާވީ ފަތިސްނަމާދު ނިންމުމުމަށްފަހު އެނބުރި ހޮޓަލަށް އައި ފަހުންނެވެ. އަދި އޭނާގެ މަރަކީ ކުއްލި މަރެއްކަމަށްވެސް އާއިލާއިން ބުނެފައިވެއެވެ.