އައިޖީއެމްއެޗްގެ ޑޮކްޓަރުން ރީޖަނަލް ހޮސްޕިޓަލްތަކަށް

ރާއްޖޭގެ ރީޖަނަލް ހޮސްޕިޓަލްތަކަށް އައިޖީއެމްއެޗްގެ 6 ޑިޕާޓްމަންޓެއް ހިމެނޭ ގޮތަށް އެކި ޑިޕާޓްމެންޓްތަކުގެ ޑޮކްޓަރުންނާއި މުވައްޒަފުން ޒިޔާރަތްކުރުމަށް ހަމަޖެހިއްޖެ އެވެ.

އައިޖީއެމްއެޗުން ބުނީ ރާއްޖޭގެ ރީޖަނަލް ހޮސްޕިޓަލްތަކަށް އެކި ޑިޕާޓްމަންޓުތަކުގެ ޑޮކްޓަރުންނާއި އެހެނިހެން މުވައްޒަފުން ޒިޔާރަތްކުރުމަށް ހަމަޖެހިފައިވަނީ މިމަހުން ފެށިގެން އޭޕްރިލް 2023 ގެ ނިޔަލަށް ކަމަށެވެ.

އެއްއަހަރު ދުވަހުގެ މުއްދަތަށް ކުރިއަށްގެންދަން ހަމަޖެހިފައިވާ މި ޒިޔާރަތްތަކުގައި ހިތުގެ ބަލިތަކަށާއި ކެންސަރު ބައްޔަށާއި ކަށީގެ ބަލިތަކަށާއި އެތެރެހަށީގެ ބަލިތަކަށާއި ކުޑަކަމުދާ ނިޒާމާ ބެހޭ ބަލިތަކަށާއި ރޭޑިއޮލޮޖީއަށް ހާއްސަ ޑޮކްޓަރުންނާއި މުވައްޒަފުން ހިމެނެއެވެ.

މި ޓީމުން ޒިޔާރަތް ކުރާނީ، ރާއްޖޭގެ ހަ ރީޖިނަލް ހޮސްޕިޓަލަކަށެވެ. އޭގެ ތެރޭގައި ކުޅުދުއްފުށީ ރީޖަނަލް ހޮސްޕިޓަލާއި އައްޑޫ އިކުއިޓޯރިއަލް ހޮސްޕިޓަލުގެ އިތުރުން އުނގޫފާރު ރީޖަނަލް ހޮސްޕިޓަލް، ގަން ރީޖަނަލް ހޮސްޕިޓަލް އަދި އަބްދުއް ސަމަދު މެމޯރިއަލް ހޮސްޕިޓަލަށެވެ.

އިއްޔެއިން ފެށިގެން، ހިތުގެ ބަލިތަކަށް ހާއްސަ ޑޮކްޓަރުން ކުޅުދުއްފުށީ ރީޖަނަލް ހޮސްޕިޓަލުގައި ބައްލަވަން ފައްޓާފައިވާއިރު އަންނަ ބުރާސްފަތި ދުވަހުން ފެށިގެން ކެންސަރުގެ ބަލިތަކަށް ހާއްސަ ޑޮކްޓަރެއް އެ ހޮސްޕިޓަލުގައި ބައްލަވާނެ ކަމަށް އައިޖީއެމްއެޗުން ބުންޏެވެ.

އައްޑޫ އިކުއިޓޯރިއަލް ހޮސްޕިޓަލްގައި ކަށީގެ ބަލިތަކަށް ހާއްސަ ޑޮކްޓަރުން ތިއްބަވާނީ މިމަހުގެ 23،24 އަދި 25 ވަނަ ދުވަހުއެވެ. އުނގޫފާރު ރީޖަނަލް ހޮސްޕިޓަލް އެތެރެހަށީގެ ބަލިތަކަށް ޚާއްސަ ޑޮކްޓަރު ފަރުވާ ދެއްވާނީ މިމަހުގެ 23،24 އަދި 25 ވަނަ ދުވަހުއެވެ.

އަބްދުލް ސަމަދު މެމޯރިއަލް ހޮސްޕިޓަލުގައި އެތެރެހަށީގެ ބަލިތަކަށް ހާއްސަ ޑޮކްޓަރު މިމަހުގެ 28،29 އަދި 30 ވަނަ ދުވަހު ފަރުވާ ދޭނެއެެވެ.