ސްޓޫޑެންޓް ލޯނަށް އިތުރު ފުރުސަތުތައް ހުޅުވާލަނީ

މަތީ ތައުލީމާއި ތަމްރީންތައް ހޯދުމަށް އިއުލާން ކުރި ސްޓޫޑެންޓް ލޯނުގެ ބަޖެޓުން ބާކީވި 21 މިލިޔަން ރުފިޔާއިން އިތުރު ފުރުސަތުތައް ހުޅުވާލުމަށް ނިންމައިފި އެވެ.

މިއަހަރުގެ ލޯން ސްކީމަށް ކަނޑައެޅި އަދަދަށް ވުރެ ލޯނު ލިބުނު ދަރިވަރުން މަދުވުމުން 21 މިލިއަން ރުފިޔާ ވަނީ ބާކީވެފައެވެ.

ހަޔަރ އެޑިއުކޭޝަން މިނިސްޓްރީގައި ބޭއްވި ނިއުސް ކޮންފަރެންސްގައި މިނިސްޓަރު ޑރ. އިބްރާހިމް ހަސަން ވިދާޅުވީ ލޯނުގެ ބަޖެޓުން ބާކީވާ ފައިސާއިން ލޯނުގެ އިތުރު ބުރަކަށް ހުޅުވާލުމުގެ މަސައްކަތް ކުރަމުން އަންނަ ކަމަށެވެ

މިދިޔަ ފެބްރުއަރީމަހު ހުޅުވާލި ލޯނުގެ 720 ފުރުސަތަށް 1000 ދަރިވަރުން ކުރިމަތިލިއެވެ. ނަމަވެސް، ބައެއް ކޯސްތަކަށް ކަނޑައެޅި ޖާގައަށް ވުރެ އެތައް ދަރިވަރުންނެއް ކުރިމަތިލުމުން ގިނަ ދަރިވަރުން ވަނީ ބާކީވެފައެވެ. އަދި ލޯނަށް އެދި ހުށައަޅާއިރު ހުށައަޅަންޖެހޭ ބައެއްކަހަލަ ލިޔެކިޔުންތައް ހުށައެޅުމުގައި ބައެއް މައްސަލަތަކެއް ހުރުމުން ވަނީ ޑިސްކޮލިފައިވެފައެވެ.

ބާކީވި ފައިސާއިން ލޯނު ދެވޭނެ ބަޔަކާއި އެކަން ކުރާނެ ގޮތްތައް ވަރަށް އަވަހަށް އެ މިނިސްޓްރީން އިއުލާންކުރާނެ އެވެ.