ކުޅުދުއްފުށީގައި ދުއްވާ ބޯޓެއް ނައިފަރު ނެރު މައްޗަށް އުރި ގެއްލުންވެއްޖެ

ކުޅުދުއްފުއްޓާއި މާލެއާ ދެމެދު ދުއްވާ "ދޮށިބޯޓް" ނައިފަރު ނެރު މައްޗަށް އުރި ގެއްލުންވެއްޖެ އެވެ. މިރޭ ގާތްގަނޑަށް 7:50 އެހާއިރު ހިނގި މިހާދިސާ ބޯޓްގެ ދެ ތަނަކުން ފަޅައިގެންދިޔަ އެވެ.

މިކަމުގައި ފުލުހުންގެ މައުލޫމާތެއް އަދި ނުލިބެ އެވެ. އެމްއެންޑީއެފުން ބުނީ ނައިފަރު ފަޅުތެރޭގައި އޮތް ބޯޓަކަށް ދިޔަވާކަމުގެ މައުލޫމާތު ލިބުމާއެކު އެމްއެންޑީއެފްގެ ނޮދަން އޭރިއާ ކޮމާންޑާ ނައިފަރު ފަޔަރ ސްޓޭޝަންގެ ސިފައިން ހަރަކާތްތެރިވަމުންދާ ކަމަށެވެ.

ނައިފަރުން ވާހަކަދެއްކި މީހަކު ބުނީ، ބޯޓް ނެރު މައްޗަށް އުރުނީ އެރަށް މުދާ ބާލާފައި ނުކުންނަށް އުޅުމުގެ ތެރޭގައި ކަމަށާ އެ ވަގުތަކީ ނައިފަރަށް ވަރަށް ވިއްސާރަ ވަގުތެއް ކަމަށެވެ.

ބޯޓުގައި ފަޅުވެރިންގެ އިތުރުން ބޯޓްގައި ކޮންމެވެސް ވަރަކަށް ދަތުރުވެރިން ތިބި ނަމަވެސް އެމީހުންގެ އަދަދު ސާފެއް ނޫނެވެ. އެކަމަކު އެ މީހާ ބުނީ މީހަކަށް އަނިޔާވިކަމުގެ މައުލޫމާތު ލިބިފައިނުވާ ކަމަށެވެ.

އޭނާ ބުނީ ނައިފަރުގެ ރައްޔިތުންނާއި ސިފައިންނާއި ފުލުހުންގެ އެހީތެރިކަމާއެކު ފަޅައިގެންގޮސްފައިވާ ދެ ތަނުގައި ޕްލާސްޓިކް ހަން ޖަހައި ދިޔަވުން ކޮންޓްރޯލްކުރެވިފައިވާ ކަމަށެވެ. އެރަށުން ވާހަކަ ދެއްކި މީހާ މައުލޫމާތުދޭ ގޮތުގައި ބޯޓުން ފަޅައިގެން ގޮސްފައިވާ ތަނުގައި ފޫޓެއް ހުންނާނެކަމަށާއި އަދި ދެ ވަނަ ތަނުގެ ބޮޑު މިނުގައި 6 އިންޗި ވަރު ހުންނާނެ ކަމަށެވެ.