ގްރީން ޓެކްސްގެ ގޮތުގައި ލިބޭ ފައިސާ ކައުންސިލްތަކަށް ދޭން ނިންމައިފި

ގްރީންޓެކުހުގެ ގޮތުގައި ލިބޭ އާމުދަނި އަންނަ އަހަރުންފެށިގެން ކައުންސިލްތަކަށް ދިނުމަށް ނިންމާފައިވާ ކަމުގައި ސަރުކާރުން ހާމަކޮށްފިއެވެ.

އއ. އުކުޅަހުގައި މިހާރު ކުރިއަށްދާ، ވިއަވަތި ރާއްޖޭ ކޮންފަރެންސްގެ އިއްޔެ އޮތް ފުރަތަމަ ސެޝަންގައި، ކައުންސިލްތަކަށް އޮތް މާލީ ގޮންޖެހުންތައް ފާހަގަކޮށް ކައުންސިލަރުން ފާހަގަކުރި ކަންބޮޑުވުންތަކަށް ފަހުގައި އެންވަޔަރަމަންޓް މިނިސްޓަރ އާމިނަތު ޝައުނާ ވިދާޅުވީ، ގްރީން ޓެކުހުގެ ގޮތުގައި މިހާރު ލިބެމުން އަންނަ އާމްދަނީ އަންނަ އަހަރުން ފެށިގެން ބަޖެޓުގައި ހިމަނައި ކައުންސިލްތަކަށް ދޭން ފަށާނެ ކަމަށެވެ.

ޝައުނާ ވިދާޅުވީ އެފައިސާ ދެއްވަނީ، ރައްކާތެރި ގޮތުގައި ކުނި ނައްތާލުމާއި ކުނި މެނޭޖު ކުރުމުގެ މަސައްކަތްތައް ކުރުމަށް ކަމަށެވެ.

ވިއަވަތި ރާއްޖެ ކޮންފަރެންސްގައި ބައިވެރިވި ކައުންސިލަރުން ވަނީ އެރަށެއްގައި ހިދުމަތްދޭ ފަތުރުވެރިކަމުގެ ހިދުމަތްދޭ ތަންތަނުން ލިބޭ ކުރީޓެކްސް އެރަށަކަށް ދިނުމަށް އެދިފައެވެ.