ވޯލްޑުން ބޭންކުން ރާއްޖެއަށް 10 މިލިއަން ޑޮލަރުގެ ހިލޭ އެހީ

ރާއްޖެއަށް 10 މިލިއަން ޑޮލަރުގެ ހިލޭ އެހީ ދިނުމަށް ވޯލްޑް ބޭންކުގެ އެގްޒެކްޓިވް ޑިރެކްޓަރުންގެ ބޯޑުން ފާސްކޮށްފިއެވެ.

އެ ބޭންކުން ނެރުނު ބަޔާނެއްގައި ބުނީ ބްރޯޑްބޭންޑް އިންޓަނެޓް މާކެޓުގައި ވާދަވެރިކަން އިތުރުކުރުމަށާއި، އޮންލައިންކޮށް ހިދުމަތްތަކުގެ ރައްކާތެރިކަން އިތުރުކޮށް ޑިޖިޓަލް ޓެކްނޮލޮޖީތަކާއި ޑޭޓާ އަދި އެނެލިޓިކްސް ބޭނުންކުރުމަށް އެހީތެރިވުމަށް، 10 މިލިއަން ޑޮލަރު (154 މިލިއަން ރުފިޔާ) ގެ ހިލޭ އެހީ ދޭން ވޯލްޑް ބޭންކުގެ އެގްޒެކްޓިވް ޑިރެކްޓަރުންގެ ބޯޑުން ނިންމައިފި ކަމަށެވެ.

ބަޔާނުގައި އިތުރަށް ބުނެފައިވަނީ މިއެހީ މޫސުމަށް އަންނަ ބަދަލުތަކާ ގުޅިގެން ކުރިމަތިވާ ގޮންޖެހުންތަކުން އަރައިގަތުމަށާއި އަދި އޮންލައިންކޮށް ހިދުމަތްތައް ހޯދުމުގައި ޑިޖިޓަލް އައިޑީ ބޭނުންކުރުން އިތުރުކުރުމަށެވެ.

އެ މަޝްރޫއު ކުރިއަށް ގެންދާނީ، ކޮމިއުނިކޭޝަން އޮތޯރިޓީ އޮފް މޯލްޑިވްސް އާއި ނޭޝަނަލް ސެންޓަ ފޮ އިންފޮމޭޝަން ޓެކްނޮލޮޖީ އަދި ޑިޕާޓްމަންޓް އޮފް ނެޝެނަލް ރެޖިސްޓްރޭޝަންގެ އެހީތެރިކަމާއެކު، މިނިސްޓްރީ އޮފް އެންވަޔަރްމަންޓް، ކްލައިމެޓް ޗޭންޖް އެންޑް ޓެކްނޮލޮޖީންނެވެ.

ބަޔާނުގައި ބުނެފައިވަނީ ރާއްޖޭގައި ފުޅާކޮށް އިންޓަނެޓްގެ ހިދުމަތް ދިން ނަމަވެސް ރަށްރަށުގައި އިންޓަނެޓްގެ ހިދުމަތް ހޯދުމަށް ގޮންޖެހުންތަކެއް ހުރި ކަމަށެވެ. ޑިޖިޓަލް އިންފްރާސްޓްރަކްޗާ އާއި އިންޓަނެޓް ޕްލެޓްފޯމްތައް ހުރި ގޮތުން ރާއްޖޭގައި ރައްކާތެރިކަމާއެކު އިންޓަނެޓުގެ ބޭނުންކުރުމަށް ދަތިތަކެއް ހުރި ކަމަށްވެސް ފާހަގަކޮށްފައިވެ އެވެ.

ވޯލްޑް ބޭންކުން ދޭ މިއެހީގެ ދަށުން ރާއްޖޭގައި ބްރޯޑްބޭންޑް އިންޓަނެޓުގެ ހިދުމަތް ފުޅާކޮށް އިންޓަނެޓު ހިދުމަތް ދޭން ބޭނުންކުރާ އިންފްރަސްޓްރަކްޗާ އާއި ޑިޖިޓަލް އިގްތިސާދެއް ބިނާކުރުމަށް ބޭނުންވާ ގާނޫނީ އަދި އިދާރީ އޮނިގަނޑުތައް ހަރުދަނާކުރާނެ އެވެ.

އެ ފައިސާ ހަމަޖެހިފައިވަނީ، ތަރައްގީވަމުން އަންނަ ގައުމްތަކަށް ލުއި ގޮތްތަކެއްގެ މަތިން އެހީތެރިކަން ފޯރުކޮށްދިނުމަށް ހާއްސަ ވޯލްޑް ބޭންކްގެ ގޮފި ކަމަށްވާ އިންޓަނޭޝަނަލް ޑިވެލޮޕްމަންޓް އެސޯސިއޭޝަން (އައިޑީއޭ)އިން ދޭ ހިލޭ އެހީގެ ގޮތުގައެވެ.