ރަޝިޔާގެ އޭރޯފްލޮޓުން ރާއްޖެއަށް ކުރާ ދަތުރުތައް އިތުރުކުރަނީ

ރަޝިޔާގެ ގައުމީ އެއާލައިން، އޭރޯފްލޮޓުން ރާއްޖެއަށް ކުރާ ދަތުރުތައް އިތުރުކުރުމަށް ނިންމާފައިވާ ކަމަށް ސިވިލް އޭވިއޭޝަން އޮތޯރިޓީން ބުނެފިއެވެ.

އެގޮތުން އަންނަ ހުކުރު ދުވަހުން ފެށިގެން އެއިރޯފްލޮޓްއިން ރާއްޖެއަށް ކުރާ ދަތުރުތައް އިތުރުކުރާނެއެވެ. މިހާރު އެއިރޯފްލޮޓްއިން ރާއްޖެއަށް ހަފްތާއަކު 4 ދަތުރު އަންނަނީ ކުރަމުންނެވެ. ދަތުރުތައް އިތުރުކުރުމުން ހަފްތާއަކު 6 ދަތުރު އެ އެއާލައިނުން ރާއްޖެއަށް ކުރާނެއެވެ.

އެއިރޯފްލޯޓުން ރާއްޖެއަށް ދަތުރުތައް ބާއްވަނީ ރަޝިއާގެ ވެރިރަށް މޮސްކޯ އިން ވެލާނާ އިންޓަނޭޝަނަލް އެއަރޕޯޓަށެވެ. ދަތުރު އިތުރުކުރުމާއިއެކު ހަފްތާގެ އަންގާރަ ދުވަސް ފިޔަވައި ކޮންމެ ދުވަހަކު ރަޝިއާއިން ރާއްޖެއަށް ދަތުރުކުރުމަށް ވަނީ ހަމަޖެހިފައެވެ.

މިދިޔަ މާޗުމަހުގެ އަށްވަނަ ދުވަހު ރަޝިއާއާއި ޔޫކްރެއިނާ ދެމެދު ކުރަމުންދާ ހަނގުރާމައާ ގުޅިގެން މެދުކަނޑާލި ނަމަވެސް މި ދަތުރުތައް އަލުން މިދިޔަ މެއި މަހު ވަނީ ފަށާފައެވެ.

ރަޝިޔާއަކީ ރާއްޖެއަށް އެންމެ ގިނައިން ފަތުރުވެރިން އައި ގައުމެވެ.