ބޯހިމެނުމުގެ ޕައިލެޓް ޕްރޮގުރާމް ދެ ސަރަހައްދެއްގައި ފަށައިފި

މި އަހަރު ސެޕްޓެމްބަރު މަހު ބޭއްވުމަށް ހަމަޖެހިފައިވާ ބޯހިމެނުމުގެ ޕައިލެޓް ޕްރޮގުރާމް ރާއްޖޭގެ ދެ ސަރަހައްދެއްގައި މޯލްޑިވްސް ބިއުރޯ އޮފް ސްޓެޓިސްޓިކްސް އިން ފަށައިފި އެވެ.

މިއަދު އެ ޕްރޮގުރާމް ފަށާފައިވަނީ މާލެ ސަރަހައްދުގެ އިތުރުން ކުޅުދުއްފުށީ ސަރަހައްދުގަ އެވެ. ކުޅުދުއްފުށީ ސަރަހައްދުން މި ޕްރޮގުރާމް ހިންގަނީ ކުޅުދުއްފުށީ އަދި ނޮޅިވަރަމުން ހޮވާލެވޭ ސަރަހައްދުތަކެއްގަ އެވެ. މީގެ އިތުރުން މާލެ، ހުޅުމާލެ، މާލޭގެ ހާބަރު ސަރަހައްދު، ތިލަފުށި، އަދި ޕެރަޑައިސް އައިލެންޑް ރިސޯޓްގައި މިހަރަކާތް ކުރިއަށްގެންދިއުމަށް ވަނީ ހަމަޖެހިފައެވެ.

ގާނޫނުގައިވާ ގޮތުން ދިވެހިރާއްޖޭގެ އާބާދީއާއި ދިރިއުޅޭ ތަންތަނުގެ ބޯހިމެނުމެއް މަދުވެގެން ކޮންމެ 10 އަހަރަކުން 1 ފަހަރު ބާއްވަންވާނެއެވެ. މިގޮތުން ދެން ބޯހިމެނުން ބޭއްވުމަށް ކަނޑައެޅިފައިވަނީ 13 އިން 25 ސެޕްޓެމްބަރ 2022 އަށެވެ. މިމުއްދަތުގައި "އާބާދީ އާއި ދިރިއުޅޭތަންތަނުގެ ބޯހިމެނުން އަދި އިޤްތިސާދީ މަސައްކަތްތަކުގެ ބޯހިމެނުން ބޭއްވުމަށް ހަމަޖެހިފައިވާކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން ވަނީ ބުނެފަ އެވެ.

ބޯހިމެނުމަކީ ގައުމީ ފެންވަރުގައި ކުރިއަށްދާ ވަރަށް މުހިއްމު ބޮޑު ހަރަކާތަކަށްވުމުން މިހަރަކާތަ ވާންޖެހޭ ފުރިހަމަ ތައްޔާރީތައް ވުމުގެ ގޮތުން ބާއްވާ ޕައިލެޓް ސެންސަސް ކުރިއަށްދާނީ މިއަދުން ފެށިގެން މި މަހުގެ 26 ވަނަ ދުވަހުގެ ނިޔަލަށެވެ. "ޕައިލެޓް ސެންސަސް" އަކީ ބޯހިމެނުމުގެ އަސްލު ހަރަކާތުގެ ކުރިން ބޯހިމެނުމުގެ ހުރިހާ މަރުހަލާތަކެއް ކުރިޔަށްދާނެ ގޮތް ދެނެގަތުމަށް ހިންގާ ހަރަކާތެކެވެ.

މިޕްރޮގުރާމް ކުރިއަށްދާ ދުވަސްތަކުގައި ހޮވާލެވިފައިވާ ސަރަހައްދުތަކަށް އެޕްރޮގުރާމްގެ ބައިވެރިން ހެނދުނު 09:00 ން 18:00 ދެމެދުގެ ވަގުތެއްގައި ދިއުމަށްވަނީ ހަމަޖެހިފައެވެ. މައުލޫމާތު އެއްކުރުމުގައި ހަރަކާތްތެރިވާ ފަރާތްތަކަށް، މޯލްޑިވްސް ބިއުރޯ އޮފް

ސްޓެޓިސްޓިކްސްގެ ހުއްދަ ދެވިފައިވާ މީހެއްކަން އަންގައިދޭ ފާހެއް ދޫކުރެވިފައިވާނެކަމަށާއި މައުލޫމާތު ދިނުމުގެކުރިން އެއީ މިފާސް

އޮތްމީހެއްތޯ ބެލުމަކީ އާންމު ރައްޔިތުންގެ ޒިންމާއެއްކަމުގައިވެސް އެ ބިއުރޯއިން ވަނީ ބުނެފަ އެވެ.

މައުލޫމާތު ނަގަން އަންނަ ފަރާތްތަކުން ނަގާ މައުލޫމާތަކީ ސިއްރު ކުރަން ޖެހޭ މައުލޫމާތު ތަކަކަށްވާއިރު އެ ފަރާތްތަކުން ނަގާނެ މައުލޫމާތުގެ ތެރޭގައި ހިމެނެނީ ތެރޭގައި ދިރިއުޅޭތަނާއި ބެހޭ މައުލޫމާތު، ގޭބިސީ ދިރިއުޅޭ ތަނުގެ ބޮޑުމިން، މީހުންގެ އުފަން ތާރީހު، ހާސިލްކޮށްފައިވާ އެންމެމަތީ ތައުލީމު، އާމްދަނީ ހޯދުމަށް ކުރާ މަސައްކަތް، ފުރަތަމަ ކައިވެނި ކުރި އުމުރު، އަންހެނުންނަށް ދަރިންގެ އަދަދު ، ފުރަތަމަ ދަރިފުޅު ލިބުނު އުމުރު ފަދަ މައުލޫމާތު ހިމެނެއެވެ.

އަދި މީގެ އިތުރުން މަސައްކަތް ހިންގާ ތަންތަނުން ނެގިގެންދާނެ މައުލޫމާތުގެ ތެރޭގައި ތަނުގެ ރަޖިސްޓްރޭޝަން ނަންބަރުގެ މައުލޫމާތު،

ތަނުގައި ހިންގާ މައިގަނޑު މަސައްކަތުގެ ތަފްސީލު، ވަޒީފާގައި ގެންގުޅޭ މުއައްޒަފުންގެ އަދަދު، ތަނުގެ އާމްދަނީ އާއި ހަރަދު މުސާރައާއި

އުޖޫރަ، ކުލި، ފެން ކަރަންޓް، ފޯނާއި އިންޓަރނެޓް، ތެލުގެ ބާވަތްތައް އަދި ތަކެއްޗަށް ހިނގި ހަރަދު ގެ މައުލޫމާތު ހިމެނެއެވެ.

މިމަސައްކަތާއި ގުޅޭގޮތުން ޝަކުވާއެއް ހުށަހެޅުމަށް ބޭނުންފުޅުވެލައްވާނަމަ މި ބިއުރޯގެ ހޮޓްލައިން ނަންބަރ 1423 އަށް ގުޅުއްވުން ނުވަތަ މިބިއުރޯގެ އީމެއިލް mv.gov.stats@complaints ނުވަތަ ވެބްސައިޓްގައިވާ ޝަކުވާ ފޯމު complaintsform/2022-in-census/mv.gov.statisticsmaldives://http /ފުރިހަމަ ކުރެއްވުމަށްފަހު އޮންލައިކޮށް ހުށައެޅުމަށް އެ ބިއުރޯއިން ވަނީ އެދިފަ އެވެ.