ކެމިކަލުން ތަޣައްޔަރުވެފައިވާ މޭބިސްކަދުރުގެ ބާވަތެއް ވިއްކުން މަނާކޮށްފި

އިންޑިއާ އިން ރާއްޖެ އެތެރެކުރި މޭބިސްކަދުރުތަކެއްގައި ހުންނަން ޖެހޭ ވަރަށް ވުރެ އިތުރަށް ޕެސްޓިސައިޑް ހުރުމުން، ޔޫރޯ ބްރޭންޑްގެ ތޯމަސް ސީޑްލެސް މޭބިސްކަދުރު ވިއްކުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ)އިން މަނާކޮށްފިއެވެ.

އެ އިދާރާ އިން ނެރުނު ބަޔާނެއްގައި ބުނީ، ގިނަ އަދަދަކަށް ޕެސްޓިސައިޑް ހުރި އިންޑިއާގެ "ޔޫރޯ ފްރުޓްސް" ބްރޭންޑްގެ "ތޮމްސަންސް ސީޑްލެސް ގްރޭޕްސް" ރާއްޖެ އެތެރެވި ކަމުގެ މައުލޫމާތު ޔޫރަޕްގެ ރެޕިޑް އެލާޓް ސިސްޓަމް ފޯ ފުޑް އެންޑް ފީޑް (އާރްއޭއެސްއެފްއެފް) އިން އަންގާފައިވާ ކަމަށެވެ.

އިންޑިއާގެ "ޔޫރޯ ފްރުޓްސް ޕްރައިވެޓް ލިމިޓެޑް" އިން އެކްސްޕޯޓް ކޮށްފައިވާ އެ ބްރޭންޑްގެ މޭބިސްކަދުރު ހޯލްސޭލް ކޮށްފައި ވަނީ ނެދަލެންޑްސްގެ "ގްލޯބަލް ގްރީން ޓީމް" ކުންފުނިންނެވެ.

އާރްއޭއެސްއެފްއެފް ގެ އެ އިންޒާރާ ގުޅިގެން، ރާއްޖޭގެ އެމްއެފްޑީއޭ އިން އަންނަނީ އެ ބާވަތުގެ މޭބިސްކަދުރުގެ ސަބަބުން ކާބޯތަކެތީގެ ރައްކާތެރިކަމަށް އޮތް ގޮންޖެހުންތަކުގެ މިންވަރު ދެނެގަތުމަށް މަސައްކަތް ކުރަމުން ކަމަށް އެ އޮތޯރިޓީން ބުންޏެވެ.

އެފްއެފްޑީއޭއިން ވަނީ ރައްކާތެރިކަމުގެ ފިޔަވަޅެއްގެ ގޮތުން 'ޔޫރޯ ފްރުޓްސް' ބްރޭންޑްގެ 'ތޮމްސަން ސީޑްލެސް ގްރޭޕްސް' ނުވިއްކުމަށް އިލްތިމާސްކޮށްފައެވެ.