ރާއްޖޭގައި މުދަލުގެ އަގު އުފުލި ރިޒާވް ދަށްވާނެ: އައިއެމްއެފް

ރާއްޖޭގައި ކާބޯތަކެއްޗާއި ތެލުގެ އަގު އުފުލި ރާއްޖޭގެ ރިޒާވް ދަށްވާނެ ކަމަށް، އިންޓަނޭޝަނަލް މަނިޓަރީ ފަންޑު (އައިއެމްއެފް)އިން މިއަދު އާންމުކުރި ރިޕޯޓުގައި ބުނެފި އެވެ.

ރާއްޖޭގެ އިގްތިސާދީ ހާލަތު ދެނެގަތުމަށް އައިއެމްއެފްގެ ވަފުދެއް މިދިޔަ މަހު ވަނީ ރާއްޖެއަށް ޒިޔާރަތްކޮށްފައެވެ. އެ ވަފުދުގެ ހޯދުންތަކާއި ދެކޭ ގޮތް ހާމަކޮށް މިއަދު ވަނީ ބަޔާނެއް ނެރެފައެވެ. އެ ބަޔާނުގައި ވަނީ އިގްތިސާދީ ގޮތުން ލަފާ ވެސް އަރުވާފައެވެ. އެ އިދާރާ އިން ލަފާ ކުރާ ގޮތުން، ރާއްޖޭގެ އިންފްލޭޝަން ރޭޓް ތިން ޕަސެންޓަށް އުފުލޭނެ އެވެ. އެއީ ވަރަށް ބޮޑު އަދަދެކެވެ.

"ކޮވިޑުގެ ސަބަބުން އެކި ހަރަދުތަކަށް ނަގާފައިވާ ލޯނުތަކުގެ ސަބަބުން ދައުލަތުގެ ދަރަނި ވަނީ އިންތިހާއަށް މައްޗަށް ގޮސްފަ. ދަރަނި ދެއްކުމަށް ރިސްކުތައް ވަރަށް ބޮޑު. މި ހާލަތުން އަރައިގަނެވޭނީ ވަކި އުސޫލުތަކެއް ހަދައިގެން،" އައިއެމްއެފްގެ ބަޔާނުގައިވެއެވެ.

ރާއްޖޭގައި ޑޮލަރުގެ ތާށިކަން އިންތިހާ އަށް ބޮޑުވެ، ކަޅު ބާޒާރުގައި ޑޮލަރުގެ އަގު އުފުލެމުންދާ ކަމަށް ވެސް ބަޔާނުގައި ފާހަގަކޮށްފައި ވެ އެވެ. އެއާ އެކު ރާއްޖޭގެ އިންޓަނޭޝަނަލް ރިޒާވް އިތުރަށް ދަށްވެ، ކާބޯތަކެއްޗާއި ތެލުގެ އަގު އިތުރަށް އުފުލި، ރިޒާވުން ކުރަން ހޭދަ ބޮޑުވާނެ ކަމަށް ވެސް ބުނެފައި ވެ އެވެ.

އައިއެމްއެފް އިން ބުނީ ދަރަނި މެނޭޖްކޮށް، މިހާރަށް ވުރެ ހަރުދަނާ އުސޫލަކުން ހަރަދުތައް ހަމަޖެއްސުމަށް މިއީ އުސޫލުތައް ރިފޯމް ކުރަންވީ ވަގުތު ކަމަށެވެ. އަދި ދައުލަތުގެ އާމްދަނީ އިތުރުވާނެ ގޮތްތައް ދެނެގަނެ، ސަބްސިޑީ ދިނުމުގެ އުސޫލުތައް ރިފޯމްކުރަން ޖެހޭ ކަމަށް އެ އިދާރާއިން ލަފާދީފައިވެ އެވެ.

ދުނިޔޭގެ އިގްތިސާދަށް އަންނަ ބޮޑެތި ލޮޅުންތަކާއެކު ރާއްޖެއަށް އެންމެ ގިނައިން ޓޫރިސްޓުން އަންނަ ގައުމުތަކުގެ އިގްތިސާދު ދަށަށް ދިއުމާ ގުޅިގެން، އެ ގައުމުތަކުން ރާއްޖެ ޒިޔާރަތް ކުރާ ޓޫރިސްޓުންގެ އަދަދު މަދުވުމުގެ ބިރު އޮތްކަން ވެސް އައިއެމްއެފްގެ ރިޕޯޓުގައި ވަނީ ފާހަގަކޮށްފައެވެ.

މީގެ އިތުރުން، އައިއެމްއެފުން ބުނި ގޮތުގައި، ސަރުކާރު ހިއްސާވާ ކުންފުނިތަކުގެ ހަރަދުތައް ބެލެހެއްޓުމަށް ސަރުކާރުން ފައިސާ ދޭން ޖެހުމާއި އެ ކުންފުނިތަކުގެ ދަރަނި ދައްކައިދޭން ސަރުކާރަށް ޖެހުމަކީ ވެސް ރާއްޖޭގެ އިގްތިސާދީ އަދި މާލީ ހާލަތަށް އޮތް ބޮޑު ގޮންޖެހުމެކެވެ.