ކުޅުދުއްފުށިން ކައްކާ ގޭސް ހުސްވެއްޖެ

ކުޅުދުއްފުށި ސިޓީން ކައްކާގެ ގޭސް ހުސްވެއްޖެ އެވެ. ކައްކާ ގޭސް ހުސްވީ، މޫސުމް ގޯސްވެ ކަނޑުގަދަވުމުގެ ސަބަބުން ކުޅުދުއްފުއްޓަށް ކައްކާ ގޭސް ހިފައިގެން އަންނަ ދޯންޏަށް ނާދެވުމުގެ ސަބަބުންނެވެ.

ކުޅުދުއްފުށީގައި ފުޅާ ދާއިރާގައި ކައްކާ ގޭސް ވިއްކާ ސޭމުން ގޭސް ހުސްވީ އިއްޔެގެ ވަގުތެއްގައި އެވެ. މައުލޫމާތު އެނގޭ މީހަކު މީހަކު ކޭއޯއަށް މައުލޫމާތު ދެމުން ބުނީ، ގޭސް ހުސްވީ ތިލަފުށިންވެސް ގޭސް ނުލިބުމުގެ ސަބަބުންނާއި މޫސުމް ގޯސްވުމުގެ ސަބަބުން ކަމަށެވެ.

އޭނާ ބުނީ، ގޭސް ބަރުކުރަން ބޯޓް ފޮނުވިއިރު ތިލަފުށިންވެސް ގޭސް ހުސްވެފައިވާ ކަމަށެވެ. ތިލަފުއްޓަށް ގޭސް ލިބި ގޭސް ބަރުކޮށްގެން ބޯޓް ކުޅުދުއްފުއްޓަށް އަންނަނިކޮށް މޫސުމް ގޯސްވެ ކާށިދޫގައި މަޑުކުރަން ޖެހުނީ ކަމަށެވެ.

ގޭސް ހިފައިގެން އަންނަ ބޯޓް ކުޅުދުއްފުއްޓަށް ދަތުރުކުރަމުންދާއިރު މޫސުމް ގޯސްވުން ފަދަ ކަމެއް ދިމާނުވެއްޖެނަމަ ގޭސް ހިފައިގެން އަންނަ ބޯޓަށް ކުޅުދުއްފުއްޓަށް އާދެވޭނެކަމަށެވެ.

ކުޅުދުއްފުށީގައި އާންމުކޮށް ކެއްކުމަށް ބޭނުންކުރަނީ ސޭމުން ވިއްކާ މޯލްޑިވް ގޭހެވެ. އުތުރުގެ ގިނަ ރަށްތަަކަށްވެސް ގޭސް ގެންދަނީ ކުޅުދުއްފުށިންނެވެ.