ދިވެހި ލައިސަންސް މެލޭޝިއާގައި ބޭނުންކުރަން ފަށައިފި

ދިވެހި ސަރުކާރުން ދޫކުރާ އެއްގަމު އުޅަނދު ދުއްވުމުގެ ލައިސަންސް މެލޭޝިއާގައި ބޭނުންކުރަން ފަށައިފި އެވެ.

ޓްރާންސްޕޯޓް މިނިސްޓްރީ އިން މިއަދު ބުނީ އިއްޔެ އިން ފެށިގެން ރާއްޖެއިން ދޫކޮށްފައިވާ އެއްގަމު އުޅަނދު ދުއްވުމުގެ ލައިސަންސް މެލޭޝިއާގައި ބޭނުންކުރަން ފަށައިފައި ކަމަށެވެ.

މި ލައިސަންސް ބޭނުން ކުރެވޭ ގޮތްވީ ޓްރާންސްޕޯޓު މިނިސްޓަރު އައިޝަތު ނަހުލާ އާއި މެލޭޝިއާގެ ޓްރާންސްޕޯޓް މިނިސްޓަރު ވީކާ ސިއޮންގް، އެއް ގައުމުން އަނެއް ގައުމުގައި ލައިސަންސް ބަލައިގަތުމަށް މިދިޔަ މަހު ސޮއިކުރި އެެއްބަސްވުމުގެ ދަށުންނެވެ.

ޓްރާންސްޕޯޓް މިނިސްޓްރީން ބުނީ، މި އެއްބަސްވުމުގެ ދަށުން މެލޭޝިއާގައި އުޅޭ ދިވެހިންނަށް، ރާއްޖޭގެ ލައިސަންސް ބޭނުންކޮށްގެން އެ ގައުމުގައި އެއްގަމު އުޅަނދުފަހަރު ދުއްވޭނެ ކަމަށާއި މެލޭޝިއާގައި ރައްޔިތުންނަށް އެ ގައުމުގެ ލައިސެންސް ބޭނުންކޮށްގެން ރާއްޖޭގައި އެއްގަމު އުޅަނދު ފަހަރު ދުއްވޭނެ ކަމަށެވެ.

މެލޭޝިއާގައި ހުންނަ ރާއްޖޭގެ ހައި ކޮމިޝަނުން ބުނި ގޮތުގައި މި އެއްބަސްވުމުގެ ދަށުން އިތުރު ހުއްދައެއް ހޯދުމަކާ ނުލައި ދިވެހި ޑްރައިވިން ލައިސަންސް ބޭނުންކޮށްގެން އެ ގައުމުގައި މިހާރު ކާރާއި ސައިކަލު ދުއްވޭނެއެވެ.

އެއްބަސްވުމުގެ ދަށުން ހުއްދަވާނީ ދިވެހި ލައިސަންސްގެ A0 އާއި B1 އަދި B2 ކެޓަގަރީގެ އުޅަނދު ފަހަރަށް ދުއްވާށެވެ.

ހައި ކޮމިޝަނުން ވަނީ ދިވެހިން މެލޭޝިއާގައި ކާރާއި ސައިކަލު ދުއްވާއިރު އެ ގައުމުގެ މަގުމަތީގެ ގަވާއިދުތަކަށް ބޯލެނބުމަށާއި ރައްކާތެރިކަމާ އެކު އުޅަަނދު ދުއްވަން އެދިފައެވެ.