ސައުދީ ގުރުއާން މުބާރާތުގެ ފައިނަލަށް ނަބީހު

ސައުދި އަރަބިއްޔާގެ ކުރީގެ ރަސްގެފާނު ކިންގް އަބްދުލް އަޒީޒްގެ ހަނދާނުގައި ބާއްވާ ބައިނަލްއަގުވާމީ ގުރުއާން މުބާރާތުން ރާއްޖޭގެ އަހުމަދު ނަބީހު އަބްދުލްގާދިރު ފައިނަލަށް ދަތުރުކޮށްފި އެވެ.

މި މަހުގެ 10 ވަނަ ދުވަހުން ފެށިގެން އަންނަ ބުދަ ދުވަހާ ހަމައަށް ގެންދާ މުބާރާތުގައި ރާއްޖެ ތަމްސީލުކުރީ ނަބީހުގެ އިތުރުން އަރަބިއްޔާ ސްކޫލުގެ ދަރިވަރު، ޔޫޝައު ޒަމްޒަމް ފާރިޝެވެ. އެ ދެ ކުދިން ހޮވާފައިވަނީ އޮޑިޝަނަކުންނެވެ.

އިސްލާމިކް މިނިސްޓްރީގެ ސްޓޭޓް މިނިސްޓަރު އިލްޔާސް ޖަމާލް ވިދާޅުވީ ސައުދީގައި ބާއްވާ އެންމެ ބޮޑު އިންޓަނޭޝަނަލް މުބާރާތުގައި 112 ގައުމަކުން، 153 ކުދިން ބައިވެރިވި ކަމަށެވެ.

މުބާރާތުގެ ނަތީޖާ އިއުލާންކުރާނީ މާދަމާ މައްކާގައި ބާއްވާ ހާއްސަ ރަސްމިއްޔާތެއްގަ އެވެ.

އިލްޔާސް ވިދާޅުވީ ސައުދީގެ އޮފިޝަލުންނަށް ނަބީހުގެ ހާލަތު ކިޔައިދިނުމުން އޭނާގެ ކިޔެވުމަށް ވަރަށް ބޮޑަށް ތައުރީފް ކުރި ކަމަށެވެ.

ނަބީހް ވަނީ މިއަހަރު އޭޕްރީލްގައި ދުބާއީގައި ބޭއްވި މުބާރާތެއްގައި ވެސް ފައިނަލަށް ދަތުރުކޮށްފަ އެވެ.