ރާއްޖޭގެ ފުރަތަމަ ޖައްވީ މިޝަންގެ ނަމަކަށް "އަޒުމް"

ރާއްޖޭގެ ފުރަތަމަ ސްޕޭސް މިޝަންގެ ނަމަކީ "އަޒުމް" ކަމަށް ކަނޑައަޅައިފި އެވެ.

އެޗްޑީސީއިން މިއަދު ބުނީ އެ ދަތުރަށް "އަޒުމް" މި ނަން ކިޔުމަށް ނިންމާފައިވާ ކަމަށެވެ. އެ ނަން ހުށަހެޅީ ސައުދުއްﷲ އިދްރީސް ނަމަކަށް ކިޔާ މީހެކެވެ.

އިންސްޓިޓިއުޓް ފޯ ގްލޯބަލް ސަކްސެސް (އައިޖީއެސް) އިން ބުނި ގޮތުގައި ޖައްވީ ޕްރޮގްރާމަށް މި ނަން ކަނޑައެޅީ މިއީ ދިވެހި ނަމަކަށްވެފައި ކޮންމެ ގައުމެއްގެ ރައްޔިތަކަށްވެސް ފަސޭހައިން މި ނަން ކިޔާލެވޭނެތީ އެވެ.

We have got a brand name for Maldives first ever space mission - Azum!
We thank Saudulla for sharing the name with us.
This space mission is for our youngsters, inspiration to take their ideas to the moon and the determination to make every dream of theirs alive. pic.twitter.com/mqunCWQsWg

— HDC (@hdcmaldives) September 19, 2022

ސްޕޭސް ޕްރޮގްރާމް ތައާރަފް ކުރުމުގެ ގޮތުން ބޭއްވި ނޫސްވެރިންގެ ބައްދަލުވުމުގައި އައިޖީއެސްގެ ޗެއާމަން އަދި ސީއީއޯ ރިފްއަތު މުހައްމަދު ވިދާޅުވި ގޮތުގައި މި ޕްރޮގްރާމްގެ ދަށުން ރާއްޖޭގައި ސްޕޭސް ކްރާފްޓް ޑިޒައިން ކޮށް، ބިލްޑް ކޮށް، ލޯންޗް ކުރުމަށްފަހު ސައިންޓިފިކް ރިސާޗް ކުރިއަށް ގެންދާނެ އެވެ.

މިމަސައްކަތަށް ދިވެހިން ތަމްރީނު ކުރުމަށް އައިޖީއެސް އިން ވަނީ އިނގިރޭސިވިލާތުގެ ކޭއެސްއެފް ސްޕޭސް ފައުންޑޭޝަންއާ އެކު އެއްބަސްވުމެއްގައި ސޮއިކޮށްފަ އެވެ. މިފައުންޑޭޝަންގެ ހިލޭ އެހީގެ ދަށުން ތަމްރީނު ޕްރޮގްރާމް ކުރިއަށް ގެންދާނީ އެމެރިކާގެ ތަޖުރިބާކާރުންނާ އެކު އެވެ.

އައިޖީއެސް އިން މިހާރު ވަނީ ސްޕޭސް މިޝަންގެ ޓީމު އެކުލަވާލާފަ އެވެ. 30 އަހަރުން ދަށުގެ ހަތް ޒުވާނުން މި ޓީމްގައި ހިމެނެ އެވެ.

ޓީމުން މިހާރު ވަނީ ނެނޯ ސެޓަލައިޓް އިންޖިނިއަރިން ޕްރޮފެޝަނަލް ކޯސް ފުރިހަމަކޮށްފަ އެވެ. މި ކޯހަކީ ސެޓަލައިޓް ހަދައި ލޯންޗުކޮށް، ސައިންޓިފިކް ދިރާސާތައް ހަދަން ދަސްކޮށްދޭ ކޯހެކެވެ.

މި ސްޕޭސް މިޝަންގައި "ޕްރޮޓައިޕް ސެޓެލައިޓް" އެއް ހަދައި ޓެސްޓްކުރާއިރު މި ސެޓެލައިޓަކީ ދުނިޔެ ހޫނުވުމާއި މޫސުމަށް އަންނަ ބަދަލުތައް ދެނެގަތުމަށް ބޭނުންވާ މައުލޫމާތު އެއްކުރަން އަޖުމަ ބެލުމުގެ ގޮތުން ހަދާ ސެޓެލައިޓެއް ކަމަށް އައިޖީއެސް އިން މީގެ ކުރިން ބުނެފައިވެ އެވެ.

ސްޕޭސް މިޝަންގެ މެއިން ޕާޓްނަރަކީ އެޗްޑީސީ އެވެ.