ގޭހާއި ހިލަވެލި ހިފައިގެން ކުޅުދުއްފުއްޓަށް ދަތުރުކުރަމުންދިޔަ ދޯންޏެއް ދިޔަވެއްޖެ

ކައްކާ ގޭހާއި ހިލަވެލި ހިފައިގެން މާލެއިން ކުޅުދުއްފުއްޓަށް ދަތުރުކުރަމުންދިޔަ މުދާ އުފުލާ ދޯންޏެއް ފަރަށް އަރަށް ދިޔަ ވެއްޖެ އެވެ. އައިޝަމް ނަމަކަށް ކިޔާ މުދާ އުފުލާ މި ދޯނި ދިޔަވާން ފެށުމުން ނޫނު އަތޮޅުގެ ފަރަކަށް އަރުވާލާފައިވާކަމަށް މައުލޫމާތު ލިބެ އެވެ.

މި ދޯނީގައި ގިނަ އަދަދަކަށް ކައްކާ ގޭހާއި ހިލަ، ހިލަވެލި އަދި ސިމެންތި ހުރިކަމަށް ދޯނީގެ ވެރި ފަރާތުން ކޭއޯއަށް މައުލޫމާތު ދިނެވެ. 70 ފޫޓްގެ މި ދޯނި ދިޔަވާން ފެށީ ކިހެނެތް ވެގެންކަމެއް އަދި ސާފެއް ނުވެ އެވެ.

ދޯނީގެ ވެރި ފަރާތްކަމުގައިވާ އަބުދުއްރަހުމާނު ބުނީ، ދޯނީގައި ތިބި ހަތަރު ދިވެހިންގެ ހާލުވެސް ރަނގަޅުކަމަށެވެ. ދޯނި ދިޔަވާން ފެށިކަމުގެ މައުލޫމާތު ލިބުނު ތަނުން އެމްއެންޑީއެފް އަންގާފައިވާ ކަމަށް އޭނާ ބުންޏެވެ.

މައުލޫމާތު އެނގޭ އެހެން މީހަކު ކޭއޯއަށް ބުނީ، ދޯނި ދިޔަވާން ފެށުމުން ފަރު މައްޗަށް އަރުވާލާފައިވާ ކަމަށާއި ދޯނީގައި ހުރި މުދާ ކޮޅު ސަލާމަތްކުރުމަށް އިތުރުން ދޯންޏެއް ކުޅުދުއްފުށިން ފުރުވާލާފައިވާ ކަމަށެވެ. އެހެންނަމަވެސް އެ ދޯންޏަށް ދެވޭނީ ރޭ ވާފަހުން ކަމަށް އޭނާ ބުންޏެވެ.

އެމްއެންޑީއެފުން ބުނީ، "އައިޝަމް" ދޯނި ދިޔަވެ އަޑިއަށް ގޮސްފައިވަނީ ށ ބޮޑުޅައިމަންދޫ ކައިރިއަށް ކަމަށާ މި ހާދިސާގެ މައުލޫމާތު މިއަދު 11:13 ހާއިރު ލިބުމާއެކު ނޮދަން އޭރިއާ ކޯސްޓްގާޑު ފަސްޓް ސްކޮޑްރަންގެ ހާބަރ ކްރާފްޓް ލޯންޗާއި ށ ފޮނަދޫގައި އޮންނަ ސީ އެމްބިއުލާންސް ވަނީ އެ ސަރަހަށްދަށް ގޮސްފައިވާ ކަމަށެވެ.

ދޯނި ދިޔަވެ އަޑިއަށްދާން ފެށުމުން އެ ދޯނި ވަނީ ށ ބޮޑުޅައިމަންދޫ ފަރާ ކައިރިކޮށްފައިވާ ކަމަށާ މި ހާދިސާގައި ދޯނިން ދަތުރުކުރި އެއްވެސް މީހަކަށް ގެއްލުމެއް ލިބިފައެއް ނުވާކަމަށް ސިފައިން ވިދާޅުވެ އެވެ. ގިނަ އަދަދެއްގެ މުދާހުރި މި ދޯނިން އޮޔާ ދިޔަ ގޭސް ފުޅިތައް ނޮދަން އޭރިއާ ފަސްޓް ސްކޮޑްރަންގެ ހާބަރ ކްރާފްޓް ލޯންޗުން ހޮވާފައިވާއިރު، މި ދޯންޏަށް އެހީތެރިވުމުގެ މަސައްކަތުގައި ނޮދަން އޭރިއާ ކޯސްޓްގާޑު ފަސްޓް ސްކޮޑްރަންގެ ސިފައިން ދަނީ ހަރަކާތްތެރިވަމުންނެވެ.