ގައުމާ މިއަދު ހަވާލުވެ ތިބީ ގައްދާރުންތަކެއް: އަދުރޭ

މިހާރު ވެރިކަމާ ހަވާލުވެ ތިވީ "ގައްދާރުންތަކެއް" މަށާއި އަދި ކޮންމެ ނަމާދަކަށް ފަހު ރައީސް ސޯލިހްގެ "ދުއްޕާނުން" ސަލާމަތްވުމަށް އެދި ދުއާ ކުރުމަށް އިދިކޮޅު ޕީޕީއެމް/ޕީއެންސީ ކޯލިޝަންގެ ވަގުތީ ލީޑަރު އަބްދުއްރަހީމް އަބްދުﷲ ވިދާޅުވެއްޖެ އެވެ.

ޕީޕީއެމް އިން މިދިޔަ ބުރާސްފަތި ދުވަހު ފެށި "ހޯޕް ކޮންފަރެންސް" ނިންމުމަށް "ދުއްޕާން"ގެ ނަމުގައި ރޭ އާޓިފިޝަލް ބީޗުގައި އޮތް ޖަލްސާގައި ވާހަކަދައްކަވަމުން އަބްދުއްރަހީމް ވިދާޅުވީ ރައީސް ސޯލިހްގެ "ދުއްޕާނުން" ގައުމު ސަލާމަތް ކުރެވޭނީ ވަރުގަދަ މަސައްކަތްތަކެއް ކޮށްގެން އަދި ރައީސް ޔާމީނަށް އަލުން ވެރިކަން ހޯދައިދީގެން ކަމަށެވެ.

އަބްދުއްރަހީމް ވިދާޅުވީ ހޯޕް ކޮންފަރެންސަށްފަހު އިދިކޮޅު ހަރަކާތްތައް ހުއްޓުވޭނެ އެއްވެސް ގޮތެއް ދެން ނޯންނާނެ ކަމަށެވެ. އަދި މިގައުމާ މިއަދު ހަވާލުވެ ތިވީ "ގައްދާރުންތަކެއް" ކަމަށް ސިފަކުރައްވާ އަބްދުއްރަހީމު ވިދާޅުވީ އެމީހުންގެ އަތުން ގައުމު ސަލާމަތް ކުރާނެ ކަމަށެވެ.

އަބްދުއްރަހީމް އިތުރަށް ވިދާޅުވީ އިދިކޮޅު ހަރަކާތްތަކަށާއި ރައީސް ޔާމީނަށް ކިތަންމެ "ދުއްޕާނެއް" ކުރި ނަމަވެސް ކުރިއަށް އޮތް ރިޔާސީ އިންތިހާބު ރައީސް ޔާމީން ކާމިޔާބުކުރައްވާނެ ކަމަށެވެ. އަދި ކޮންމެ ނަމާދަކަށް ފަހު ރައީސް ސޯލިހްގެ "ދުއްޕާނުން" ސަލާމަތްވުމަށް އެދި ދުއާ ކުރުމަށްވެސް އަބްދުއްރަހީމް އެދިވަޑައިގެންނެވި އެވެ.

މި ޖަލްސާގައި ކުރީގެ ރައީސް އަބްދުﷲ ޔާމީން އަބްދުލްގައްޔޫމް މިނިވަންކޮށް، ރާއްޖޭގެ ވެރިކަމަށް ގެނައުމަށް ކުރަން ޖެހޭ ހުރިހާ މަސައްކަތެއް ކުރުމަށް "ހޯޕް ކޮންފަރެންސް"ގެ މަންދޫބުން ވަނީ އަހުދުވެފަ އެވެ. މި ޖަލްސާގައި އަހުދު އިއްވައިދިނީ ރައްޔިތުންގެ މަޖިލީހުގެ ކުރީގެ އަމީން އާންމު އަހުމަދު މުހައްމަދެވެ.

މަންދޫބުންވީ އަހުދުގައި ބުނެފައިވަނީ، ރައީސް ޔާމީންގެ މައްޗަށް އިއްވާފައިވާ ހުކުމަކީ ފަނޑިޔާރުގެއަށް ނުފޫޒު ފޯރުވައިގެން އިއްވާފައިވާ ހުކުމެއް ކަމަށެވެ.

ރައީސް ޔާމީން ރާއްޖޭގެ ވެރިކަމަށް ގެނައުމަށް "ހޯޕް ކޮންފަރެންސް"ގެ މަންދޫބުން އަހުދުވި އިރު، މަނީލޯންޑަރިންނާއި ރިޝްވަތުގެ ކުށް ސާބިތުވެ ރައީސް ޔާމީން ގެންދަވަނީ 11 އަހަރުގެ ޖަލު ހުކުމެއް ތަންފީޒުކުރައްވަމުންނެވެ.

އެމްއެމްޕީއާރްސީގެ ހިޔާނާތުގެ މައްސަލައިގައި ރައީސް ޔާމީނަށް ހުކުމެއް އައިސްފައިވާ އިރު ރ. ފުއްގިރި މައްސަލައިގައި ރައީސް ޔާމީންގެ މައްޗަށް ކުރާ ރިޝްވަރު ގަބޫލުކުރުމާއި މަނީ ލޯންޑަރިންގެ ދައުވާގެ ޝަރީއަތްވެސް ކުރިމިނަލް ކޯޓުގައި މިހާރު ވަނީ ފަށައިފައެވެ.