ހދ އަތޮޅަށް ހުޅުވާލައިގެން މެއިމަހު ކުޅުދުއްފުށީގައި ބަށިބޯޅަ މުބާރާތެއް ބާއްވަނީ

ކުޅުދުއްފުށީ ސިޓީ ކައުންސިލާއި ކުޅުދުއްފުށީ އަންހެނުން ތަރައްގީއަށް މަސައްކަތް ކުރާ ކޮމެޓީ ގުޅިގެން ހދ އަތޮޅަށް ހުޅުވާލައިގެން ކުޅުދުއްފުށީގައި ބަށިބޯޅަ މުބާރާތެއް ބާއްވަން ނިންމައިފި އެވެ.

ކޭއޯއަށް މައުލޫމާތު ދެއްވަމުން ސިޓީ ކައުންސިލްގެ ޑެޕިއުޓީ މޭޔަރު އަލީ އަހުމަދު ވިދާޅުވީ މި އަހަރު ބަށިބޯޅަ މުބާރާތް ކުރިއަށްގެންދަން ހަމަޖެހިފައިވަނީ އަންނަ މެއިމަހު 11 އިން ފެށިގެން ކަމަށެވެ.

ޑެޕިއުޓީ މޭޔަރު ވިދާޅުވީ މުބާރާތް ކުރިއަށްގެން ހަމަޖެހިފައިވަނީ ހދ އަތޮޅުގެ ހުރިހާ ރަށަކަށްވެސް ބައިވެރިވެވޭނެ ގޮތަށް ކަމަށާއި، އެއް ރަށަކުން 1 ޓީމަށްވުރެށް އިތުރަށްވެސް ބައިވެރިކުރެވޭނެ ކަމަށެވެ.

މިއަދު އޮތް އެ ކައުންސިލްގެ ހަތަރުވަނަ ދައުރުގެ 89 ވަނަ އާންމު ބައްދަލުވުމުގައިވަނީ މި މުބާރާތް އައުޓް ސޯސްކޮށްގެން ހިންގުމަށް މަޝްވަރާކޮށް ފާސްކޮށްފަ އެވެ.

ބަށި ބޯޅަ ފައުންޑޭޝަންއިންވެސް ފަންނީ އެހީ ހޯދައިގެން ކުރިއަށްގެންދާ މި މުބާރާތުގައި 18 އަހަރުން މަތީގެ ކޮންމެ ފަރާތަކަށްވެސް ކުޅުމުގެ ފުރުސަތު ލިބޭނެކަމަށް ފާހަގަކުރައްވާ ޑެޕިއުޓީ މޭޔަރު ވިދާޅުވީ ޒަމާނުންސުރެން ކުޅުދުއްފުށީގައި ރަނގަޅަށް ކުޅެމުން އައި ނަމަވެސް މިހާރު އުވެމުންދާ ކުޅިވަރެއްކަމުން ވީހާވެސް ބޮޑަށް އަލަށް މި ކުޅިވަރަށް ނުކުންނަން ބޭނުންވާ ފަރާތްތަކަށް ފުރުސަތު ދީގެން ޓީމުތައް ހެދުމަށް އިސްކަން ދިނުމަކީ މުހިންމު ކަމެއް ކަމަށެވެ.

މިދިޔަ އަހަރުވެސް ކުޅުދުއްފުށީގައި ބަށިބޯޅަ ފައުންޑޭޝަން އިން އިންތިޒާމުކޮށްގެން ވަނީ ހދ އަތޮޅަށް ހުޅުވާލައިގެން ބަށިބޯޅަ މުބާރާތެއް ބާއްވާފަ އެވެ. އެ މުބާރާތުގައި ބައިވެރިވެފައިވަނީ ޖުމްލަ 4 ޓީމަކުންނެވެ. މި އަހަރުވެސް މި މުބާރާތް ބޭއްވުމަށް ހަމަޖެހިފައިވަނީ ކުޅުދުއްފުށީ ސްޓޭޑިއަމްްގެ ފުޓްސެލް އެރީނާ ދަނޑުގަ އެވެ.