ދެ ރައީސުންގެ މައްސަލަ ކޯޓުން ބޭރުކޮށްލައިފި

ރައީސުލްޖުމްހޫރިއްޔާގެ މަގާމުގައި ހުންނެވި ބޭފުޅަކާ މެދު ގާނޫނީ ސުވާލު އުފެދިފައިވާ ކަމަށް ބުނެ އެކަމުގައި ގޮތެއް ނިންމުމަށް އިދިކޮޅު ޕީޕީއެމް ޕީއެންސީ ކޯލިޝަނުން ސުޕްރީމް ކޯޓަށް ހުށަހެޅި ދުސްތޫރީ މައްސަލަ ބޭރުކޮށްލައިފި އެވެ.

މި މައްސަލަ ބަލައިނުގަތުމަށް ނިންމާފައިވާކަން އިދިކޮޅު ކޯލިޝަނުގެ ލީޑަޝިޕާއި އެ ކޯލިޝަނުގެ ގާނޫނީ ވަކީލުންގެ ޓީމުން ވަނީ އިއްޔެ ބޭއްވި ނޫސްވެރިންގެ ބައްދަލުވުމެއްގައި ކަށަވަރު ކޮށްދީފަ އެވެ.

އެގޮތުން އެ ނޫސްވެރިންގެ ބައްދަލުވުމުގައި ވާހަކަދައްކަވަމުން ވަކީލުންގެ ޓީމުގައި ހިމެނޭ އަހުމަދު ސިއްދީގު ވިދާޅުވީ، މައްސަލަ ބަލައިނުގަތުމަށް ނިންމާ ކޯޓުން ދިން ލިޔުމުގައި ބުނެފައި އޮތީ މައްސަލަ ބަލައިނުގަތީ ކޯޓުތަކުގެ ގާނޫނުގެ 11 ވަނަ މާއްދާގައި ބަޔާން ކުރާ ފަދަ ދުސްތޫރީ މައްސަލައަކަށް ނުވާތީ ކަމަށެވެ.

މިއީ މި މައްސަލަ އިދިކޮޅު ކޯލިޝަނުން ސުޕްރީމް ކޯޓަށް ހުށަހެޅި ދެވަނަ ފަހަރެވެ. މީގެ ކުރިންވެސް މި މައްސަލަ އެ ކޯޓުން ބަލައިނުގަނެ ބޭރުކޮށްލި އެވެ.

މިފަހަރު މި މައްސަލަ ހުށަހެޅި ދުވަހު ސިއްދީގު ވިދާޅުވީ ފައިސަލް ނަސީމް ކުރެއްވި ހުވަޔަކީ ގާނޫނުއަސާސީގައި ކުރައްވަން އޮތް ހުވަޔެއްތޯ ސާފުކުރުމުގެ ގޮތުން ގާނޫނުއަސާސީ މާނަކުރުމަށް އެދިފައިވާނެ ކަމަށެވެ.

ރައީސްކަމުގެ ހުވާ ނައިބު ރައީސް ފައިސަލް މިދިޔަ އަހަރު ކުރެއްވީ ރައީސް އިބްރާހިމް މުހައްމަދު ސޯލިހު ތިން ގަޑިއިރުގެ ސާޖަރީއެއް ކުރެއްވުމަށްޓަކަ އެވެ.

އެ ދުވަހުގެ ފަތިހު 5:50 ގައި ރައީސުލްޖުމްހޫރިއްޔާގެ މަސްއޫލިއްޔަތުތަކާ ނައިބް ރައީސް ހަވާލުވެވަޑައިގަތީ ރައްޔިތުންގެ މަޖިލީހުގެ އިދާރާގައި މަޖިލީހުގެ ރައީސް މުހައްމަދު ނަޝީދުގެ ކުރިފުޅުމަތީގައި ރައީސުލްޖުމްހޫރިއްޔާގެ ހުވާކުރައްވައިގެންނެވެ. ހުވާ ލައިދެއްވީ އުއްތަމަ ފަނޑިޔާރު އަހްމަދު މުއުތަސިމު އަދުނާން އެވެ. ނަމަވެސް ހުވާކުރެއްވިތާ ތިން ގަޑިއިރާއި 40 މިނެޓް ފަހުން ރައީސް ސޯލިހް އަލުން ވަނީ ރައީސުލްޖުމްހޫރިއްޔާ މަގާމުގެ މަސްއޫލިއްޔަތުތަކާ ހަވާލުވެވަޑައިގެންފަ އެވެ. މިހުރިހާ ކަމެއްވެސް ރައީސް އޮފީހުން ރަސްމީކޮށް އިއުލާންކޮށްފައިވެ އެވެ.

އިދިކޮޅު ކޯލިޝަނުން ސުޕްރީމް ކޯޓަށް މައްސަލަ ހުށަހެޅީ ނައިބު ރައީސް އެ ހުވާ ކުރެއްވި ވަގުތުން ފެށިގެން ރައީސަކީ އެ މަނިކުފާނު ކަމަށް ބުނެ އެވެ.

އެ މައްސަލަ ބަލައިނުގަތުމަށް ސުޕްރީމް ކޯޓުން ނިންމައި، އެކަން އިއްޔެ ވަނީ އަންގައިފަ އެވެ.