އެމްއެމްއޭގައި މަސައްކަތްކުރާ ގާތުންދޭ މައިންނަށް އިތުރު ލުޔެއް

ރާއްޖޭގެ މަރުކަޒީ ބޭންކް (އެމްއެމްއޭ)ގައި މަސައްކަތް ކުރާ ގާތުންދޭ މައިންނަށް ދެވޭ 1 ގަޑިއިރުގެ ވަގުތު 2 ގަޑިއިރަށް އިތުރުކޮށްފިއެވެ.

އެމްއެމްއޭއިން މިގޮތަށް ނިންމާފައި ވަނީ ބައިނަލް އަގްވާމީ ގޮތުން ފާހަގަކުރާ އަންހެނުންގެ ދުވަހާއި ގުޅިގެން އިއްޔެ ބޭއްވި ބައްދަލުވުމުގައެވެ.

އެގޮތުން މުވައްޒަފުންގެ ހާއްސަ ބައްދަލުވުމެއް ބާއްވާފައިވާއިރު، އެމްއެމްއޭ އަކީ މިންތީގެ ހަމަހަމަކަށް ގާއިމުކޮށް އަންހެނުންނަށް ވަޒީފާއަދާކުރުމުގައި ފަސޭހަ މާހައުލެއް އުފެއްދުމަށް ގިނަ މަސައްކަތްތަކެއް ކުރަމުންދާ އިދާރާއެކެވެ.

އޭގެ ތެރެއިންވެސް އެންމެ ފާހަގަކޮށްލެވޭ ކަމެއްގެ ގޮތުގައި އެމްއެމްއޭގެ ލީޑާޝިޕް އަންހެނުންގެ ދައުރު އަބަދުވެސް ބޮޑުވުން ހިމެނެއެވެ.

އެމްއެމްއޭ އިން ބުނީ އެ އޮތޯރިޓީން ގާތުންދޭ މައިންނަށް ދެވޭ އެއް ގަޑިއިރުގެ ވަގުތު ދެ ގަޑިއިރަށް އިތުރު ކުރުމުން، މިއަދުން ފެށިގެން ގާތުންދޭ ހުރިހާ މައިންނަށް ވެސް މަސައްކަތުގެ ގަޑީގެ ތެރެއިން ދެ ގަޑިއިރުގެ ހުސްވަގުތެއް ދަރިފުޅާއެކު ހޭދަކުރުމަށް ލިބިގެންދާނެ ކަމަށެވެ.

އަންހެނުންގެ ކުރިއެރުމަށް އިސްކަން ދިނުމުގައި އެމްއެމްއޭ އިން އަބަދު ވެސް ނަމޫނާ ދައްކަމުންދާކަން ފާހަގަކޮށްލެވެއެވެ. އަދި ވިހެއުމާ ގުޅިގެން ދެވޭ ޗުއްޓީ 6 މަސްދުވަހަށް އިތުރުކުރި އެންމެ ފުރަތަމަ އެއް އިދާރާއަކީ ވެސް އެމްއެމްއޭ ކަން ފާހަގަކޮށްލެވެއެވެ.