ސިމް ނެގޭ މިންވަރެއް ކަނޑައަޅައި، ސްކޭމްތަކަށް ބޭނުންކުރާ ސިމްތައް ބްލޮކް ކުރަނީ

އެކަކަށް މޯބައިލް ސިމް ނެގޭ މިންވަރު ކަނޑައެޅުމުގެ މަސައްކަތް އަންނަ މޭ މަހުގެ ތެރޭގައި ފަށާނެ ކަމަށް، ކޮމިއުނިކޭޝަންސް އޮތޯރިޓީ އޮފް މޯލްޑިވްސް (ކޭމް) އިން ބުނެފި އެވެ.

ސްކޭމް ކޯލްތައް އިތުރުވާ މައްސަލަ ދިރާސާކުރުމަށް މަޖިލީހުގެ އެސްއޯއީ ކޮމިޓީން ކުރަމުންދާ މަސައްކަތުގެ ތެރެއިން ކޮމިޓީ ބައްދަލުވުމަށް ކޭމްގެ ބޭފުޅުން ވަނީ ހާޒިރުކޮށްފަ އެވެ.

އިއްޔެގެ ބައްދަލުވުމުގައި ކޭމްގެ ޗީފް އެގްޒެކެޓިވް އިލްޔާސް އަހުމަދު ވިދާޅުވީ، އެކަކަށް ނެގޭ ސިމް ކާޑުގެ މިން ކަނޑައެޅުމުގެ މަސައްކަތް އެންމެ ލަސްވެގެން މެއި މަހުގެ ތެރޭގައި ފެށިގެންދާނެ ކަމަށެވެ.

އިލްޔާސް އެހެން ވިދާޅުވީ، އެކި މީހުންގެ ނަމުގައި ނަގާފައިވާ ސިމް ކާޑުތައް ބޭނުންކޮށްގެން ކުރާ ސްކޭމްތަކުގައި ބޭންކް އޮފް މޯލްޑިވްސް (ބީއެމްއެލް)ގެ އެކައުންޓުތަކުން ފޭރޭ މައްސަލައިގައި ރައްޔިތުންގެ މަޖިލީހުގެ ސްޓޭޓް އެންޑް އެންޓަޕްރައިޒަސް (އެސްއޯއީ) ކޮމިޓީން ކަމާ ގުޅުންހުރި އިދާރާތަކާ ބައްދަލުކުރުމަށް ބޭއްވި ބައްދަލުވުމުގައި އެކަން ހައްލުކުރުމަށް ކުރަމުންދާ މަސައްކަތްތަކާބެހޭ މައުލޫމާތު ދެމުންނެވެ.

އެކެއްގެ ނަމުގައި ނަގާފައިވާ ސިމްތަކާއި އައިޑެންޓިޓީ ވެރިފައި ކުރުމަށްފަހު ނަންބަރުތައް ބްލޮކް ކުރުމުގެ މަސައްކަތްވެސް މެއި މަހު ފަށާނެ ކަމަށް ވިދާޅުވި އެވެ. އެކަމަށް ތިން މަސް ދުވަހުގެ މުއްދަތެއް ނަގާނެ ކަމަށް އޭނާ ވިދާޅުވި އެވެ.

މީގެ ކުރީން ބޭއްވި ކޮމިޓީ ބައްދަލުވުމަށް މައުލޫމާތު ދެމުން ފުލުހުން ވަނީ ދެ ބިދޭސީންގެ ނަން މަތީ 24،000 ސިމް އަދި 12 ބިދޭސީއެއްގެ ނަންމަތީ ދިރާގުގެ 38،000 ސިމެއް ނަގާފައިވާ ކަމަށް ބުނެފަ އެވެ. އަދި އެކެއްގެ ނަންމަތީ 800 އަށްވުރެ ގިނަ ސިމް ނަގާފައިވާއިރު، އޭގެ އިތުރުން ރާއްޖޭގައި ނޫޅޭ ބިދޭސީން، ކޮންމެ މީހަކަށް އެވްރެޖުކޮށް 5،000 ސިމް ނަގާފައިވާ ކަމަށް ބުންޏެވެ.