ޤުރުއާން މުބާރާތުގައި ހާފިޒުންގެ ކެޓަގަރީގައި އެއްވެސް މީހަކު ބައިވެރިއެއް ނުވި

ކުޅުދުއްފުށީގައި މިއަދު ފެށި ކައުންސިލް ގުރުއާން ކިޔެވުމުގެ މުބާރާތުގެ ހާފިޒުންގެ ބައިގައި އެއްވެސް މީހަކު ބައިވެރިއެއް ނުވި އެވެ. ސިޓީ ކައުންސިލުން އިންތިޒާމުކޮށްގެން ކުރިއަށްދާ މި މުބާރާތް ކުރިއަށްދަނީ އަފީފުއްދީން ސްކޫލު ހޯލުގައި އެވެ.

ޤުރުއާން މުބާރާތް ފެށުމުގެ ރަސްމިއްޔާތުގައި ވާހަކަދައްކަވަމުން ޑެޕިއުޓީ މޭޔަރު އަލީ އަހުމަދު ވިދާޅުވީ، ތިން ކެޓަގަރީއަކުން މުބާރާތުގައި ވާދަކުރުމަށް ހުޅުވާއިރު ހާފިޒުން ބައިން އެއްވެސް މީހަކު ބައިވެރިނުވާ ކަމަށެވެ.

"އަޅުގަނޑުމެން ތިން ކެޓަގަރީއަކުން ކުރިއަށްގެންދަން ޤުރުއާން މުބާރާތް ރާވާލާފައި އޮތްކަމުގައިވިޔަސް ހާފިޒުންގެ ބައިން އެއްވެސް ބައިވެރިއެއް ބައިވެރިނުވާކަން ހިތާމައާއެކު ފާހަގަކޮށްލަން." ޑެޕިއުޓީ މޭޔަރު ވިދާޅުވި އެވެ.

ކީރިތި ޤުރުއާން ހިތުދަސްކުރެވިފައިވާ ގިނަ ބަޔަކު ސިޓީގައި އުފެއްދުމުގެ މުހިންމުކަން ފާހަގަކޮށް ހުރިހާ ފަރާތްތަކުންވެސް އެ މަގުން މަސައްކަތްކޮށްދެއްވުމަށް އޭނާ އިލްތިމާސްކުރެއްވި އެވެ.

މިއަހަރުގެ ގުރުއާން މުބާރާތުގައި ޖުމްލަ 165 ދަރިވަރުން ކިޔަވާނެ އެވެ. މުބާރާތުގައި ބައިވެރިވެފައިވަނީ ކުޅުދުއްފުށީގައި ހުންނަ ސަރުކާރުގެ ތިން ސްކޫލުންނާއި 6 ޤުރުއާން ކުލާހަކުންނެވެ.