އިސްރާއީލް ސިފައިން އަނެއްކާ ވެސް އަގްސާ މިސްކިތަށް ހަމަލާދީފި

އިސްރާއީލްގެ ހައްދުފަހަނަ އަޅާފައިވާ ސިފައިން، މަސްޖިދުލް އަގްސާ އަށް އަނެއްކާ ވެސް ހަމަލާ ދީފިއެވެ. އިސްރާއީލް ސިފައިން އަޅުކަން ކުރަން ތިބި މީހުންނަށް ހަމަލާ ދިން އިރު، އޭގެ ތެރޭގައި އަންހެނުން ވެސް ހިމެނެއެވެ.

މިއީ އިސްރާއީލް ސިފައިން އަގްސާ މިސްކިތަށް ވަދެ އެތަނަށް ގެއްލުން ދީ، ފަލަސްތީން ރައްޔިތުންނަށް އަނިޔާކޮށް ހައްޔަރު ކުރި ދެވަނަ ރެއެވެ. އިސްރާއީލް ސިފައިން ވަނީ ހަތިޔާރާއެކު އަލް އަގްސާ އަށް ވަދެ، އަޅުކަން ކުރަން ތިބި މީހުންނަށް މުގުރި ބުރިންނާއި ކަރުނަ ގޭހުގެ އިތުރުން ސްމޯކް ބޮމުން ހަމަލާދީފައެވެ. އަދި ސްޓަން ގްރެނޭޑްސް އާއި ރަބަރު ވަޒަން ވެސް ސިފައިން ބޭނުން ކުރިއެވެ.

އިސްރާއީލް ސިފައިން މިހާރު ވަނީ މުޅި އަލް އަގްސާ އިން އެންމެން ނެރެ، އެމީހުންގެ ބާރުގެ ދަށަށް މުޅި މިސްކިތް ގެނެސްފައި ކަމަށް ބޭރުގެ މީޑިއާތަކުން ބުނެއެވެ. އެގޮތުން އިއުތިކާފަށް މިސްކިތުގައި ތިބި މީހުން ވެސް ވަނީ މިސްކިތުން ނެރެފައެވެ.

އިސްރާއީލް ސިފައިން އަގްސާ މިސްކިތް ތެރެއަށް ވަދެ، އެ ތަނުގައި ނަމާދު ކުރަން ތިބޭ މީހުންނަށް އަނިޔާ ކުރަމުން އަންނަތާ މިހާރު ދުވަސްކޮޅެއްވެއްޖެއެވެ. މި ރޯދަ މަސް ފެށުނު ފަހުން އިސްރާއީލްގެ އަސްކަރިއްޔާގެ އަނިޔާވެރިކަން ވަނީ ހައްދުފަހަނަ އަޅައިގެން ގޮސްފައެވެ. އިސްރާއީލް ސިފައިން ވަނީ ނަމާދަށް ގޮސް ތިބި އެތައް ބަޔަކު ހައްޔަރު ވެސް ކޮށްފައެވެ.

ފަލަސްތީންގެ ބޮޑުވަޒީރު މުހައްމަދު ސައްތާހު ނެރުއްވި ބަޔާނެއްގައި ވިދާޅުވީ އަގްސާ މިސްކިތުގައި ނަމާދު ކުރުމަކީ ހުރިހާ މުސްލިމުންނަށް ވެސް އޮތް ހައްގެއް ކަމަށާއި ޔަހޫދީން އެމިސްކިތައް ވަދެ، މިސްކިތުގެ ހުރުމަތް ކެނޑުން އެއީ ކުރެވޭނެ ކަމެއް ނޫން ކަމަށެވެ.