ވައިކަރަދޫ ކައުންސިލްގެ އެސްޖީއަކަށް އަތޮޅު ކައުންސިލްގެ ކުރީގެ ރައީސް

ހުސްވެފައިވާ ހދ ވައިކަރަދޫ ކައުންސިލްގެ ސެކްރެޓަރީ ޖެނެރަލްގެ މަގާމަށް ހދ އަތޮޅު ކައުންސިލް ފުރަތަމަ ދައުރުގެ ރައީސްކަން ކުރެއްވި ހުސެއިން ރަޝީދު ހަމަޖައްސައިފި އެވެ. އެ މަގާމަށް ހަމަޖެއްސުމުން މިއަދު އޭނާ ވަނީ ވަޒީފާއަށް ނުކުންނަވަން ފައްޓާފަ އެވެ.

މިއީ އެރަށު ކައުންސިލްގެ އެސްޖީގެ މަގާމަށް ބޭފުޅަކު ހަމަޖެއްސި ދެ ވަނަ ފަހަރެވެ. ފުރަތަމަ އެ މަގާމުގައި ހުންނެވި އައިޝަތު ފަސާނާ އެމަގާމުން އިސްތިއުފާދެއްވީ 2023 ވަނަ އަހަރުގެ ޖެނުއަރީމަހު އެވެ.

އަތޮޅު ކައުންސިލްގެ ފުރަތަމަ ދައުރުގައި ރައީސްކަން ކުރެއްވި ހުސެއިން ރަޝީދު ފާހަގަކުރެވިފައިވަނީ ހިންގުންތެރި، އަތޮޅަށް ތަރައްގީ ގެނައުމަށް މަސައްކަތް ކުރެއްވި ބޭފުޅެއްގެ ގޮތުގައި އެވެ.

ތައުލީމީ ދާއިރާގައި ގިނަ އަހަރުތަކެއްގައި މަސައްކަތްކުރެއްވި ހުސެއިން އެންމެ ފުރަތަމަ އަދާކުރެއްވީ ވައިކަރަދޫގައި ހުންނަ އަތޮޅު މަދަރުސާގެ ޓީޗަރެއްގެ ވަޒީފާ އެވެ. އެއަށްފަހު މާލޭގެ ބައެއް ސްކޫލުތަކުގައި ލީޑިންގ ޓީޗަރުންގެ މަގާމާއި އެޑިއުކޭޝަންގެ މިނިސްޓްރީގެ އިސް ބައެއް މަގާމުތައް ހުސެއިން ފުރުއްވާފައިވެ އެވެ.